1. Home
  2. Åarjelsaemien voestesgïeline BF jïh SRChevronRight
  3. SoptseshChevronRight
  4. Soptsesi bïjreChevronRight
  5. Saemien soptsestimmievuekieChevronRight
  6. Saajve-jaevresne gööleminieChevronRight
SharedResourceDelte ressurser

Kildemateriale

Saajve-jaevresne gööleminie

Daate tjaalege lea gærjeste Staaloeh vienhtieh aske lea dålle, maam Kirsti Birkeland tjaaleme. Ella Holm Bull lea tjaalegem åarjelsaemien gïelese jarkoestamme.

Iehkeds-gååkse jaevrie-bealesne. Guvvie.

Saajve-jaevresne gööleminie

Ikth ligan göökte saemieh gïeh vaaran vöölkigan edtjigan nuehtine gööledh. Akte lij båeries dïhte mubpie noere. Goh dan jaevrien gåajkoe böötigan dellie eelkigan gööledh. Vaenieh guelieh åadtjoejigan, guktie latjkajigan edtjigan orrijidh jïh gåatan vuelkedh. Dle dïhte båarasommes jeehti:

- Manne jaevriem daajram gusnie leah jïjnjh guelieh, stoerre buajtehke. Dïhte gidtjh dïhte, ij desnie nåhtedh guelieh åadtjodh jis ij buektehth sjeavodh årrodh. Juktie dïhte lea saajve-jaevrie.

- Baejien dahkoe vaedtsedh, dïhte nööremes saemie jeehti.
- Nov manne maahtam sjeavodh årrodh.

Nimhtie dellie dan saajve-jaevrien gåajkoe vöölkigan. Ojhte nuehtiem jaavran vaerhpiedigan jïh gaadtan geesigan. Nuehtie lij dïeves vievtjije guelijste. Dellie dïhte nööremes ussjedi: Eah daah guelieh maehtieh olkese tjihtedidh. Eah daennie viermesne fiejlieh gååvnesh.

Jïh dellie ojhte baakoem miste lööjhti. Idtji buektehth sjeavodh årrodh. Dallatjinie lij nuehtie öövre gåaroes, idtji vielie guelie vååjnh. Dellie dïhte båarasommes saemie jeehti:

- Ij monnese daesnie nåhtedh gööledh. Aerviedim idtji datne buektehth sjeavodh årrodh.

- Baejien ikth vielie voejhkelidh, dïhte mubpie jeehti, - nov edtjem daan aejkien gaegniedidh.

Dellie vihth nuehtiem jaavran vaerhpiedigan. Jïh dellie gaadtan geesigan. Gosse nuehtiem gaadtan geaseme, dellie vööjnigan nuehtie tjaebpies guelijste dïeves. Dillie vihth ussjedi:

- Eah edtjh daelie guktemes laakan olkese luajhtasovvedh.

Jïh dam aaj jeehti. Dallatjinie lin gaajhkh guelieh haajpanamme. Idtjigan maam åadtjoeh. Dillie dïhte båeries saemie jeehti:

- Buerebe gåatan vaedtsien. Ij monnese daesnie lahkaskovh guelieh åadtjodh, gosse ij daate mov voelpe buektehth sjeavodh årrodh.

Die dïhte nööremes ikth vielie tjoemehti jïh luhpiehti idtji edtjh satneste daelie vielie gïelem govledh.

- Aajja, jis datne sïjhth. Daelie leam lïereme!

Vihth nuehtiem jaavran vaerhpiedigan. Gaadtan aaj geesigan. Daelie lij aaj guelijste dïeves. Mahte lij baakoem biestieminie, dellie maajetjh buektiehti njaelmiem steeredh. Gosse nuehtiem gaadtan geaseme, dellie ojhte alvas saalehtem åadtjoejigan, jïh stoerre, buajtehks guelieh lin. Daelie dle båarasommes saemie jeehti:

- Dellie vuajnah. Gosse barre månnoeh limen sjeavodh, dellie jïjnjh guelieh åadtjoejimen.

Nimhtie lea saajve-jaevrine. Jis daesnie sæjhta gööledh, die tjuara sjeavodh årrodh.

Baakoeh

Saemien

Daaroen

lahkasovh

lahkasieh - bli igjen hist og her

vievtjije

sprellende

guktemes laakan

på hvilken som helst måte

Saajve-jaevresne gööleminie, Ejva-Krihke Jonassen låhka

0:00
Saajve-jaevresne gööleminie, Ejva-Krihke Jonassen låhka

Læringsressurser

Saemien soptsestimmievuekie

SubjectEmne

Læringssti

SubjectEmne

Fagstoff

SubjectEmne

Oppgaver og aktiviteter

SubjectEmne

Kildemateriale