Fïerhten biejjien mijjieh tjaalegh lohkebe, jïh jeenjemes tjaalegijstie leah aamhtese-prosa. Dellie lohkebe mij heannede veartanisnie gusnie jielebe. Saernieh jïh reklaame ovmessie meedijisnie leah aamhtese-prosa. Tjaalegh lohkeme-gærjine jïh SMS-bïevnesh aaj aamhtese-prosa.
Aamhtese-tjaalegh maehtieh dovne tjaaleldh jïh njaalmeldh årrodh. Gellien aejkien tjaelije tjïelke åssjelem åtna tjaaleginie gosse aamhtese-tjaalegem tjaala. Naan aamhteseprosa-tjaalegh maahtoem mijjese vedtieh, vuesiehtimmien gaavhtan guktie edtjebe gaahkoeh bååhkesjidh jallh guktie edtjebe gaamegh gåarodh.
Gosse edtjh aamhtese-tjaalegh tjaeledh dellie hijven maallen mietie tjaeledh. Daennie kapihtelisnie datne raerieh åadtjoeh guktie maahtah ovmessie tjaalegh vïjhteboelhken-vuekien mietie tjaeledh. Aaj åadtjoeh ovmessie tjaalegh lohkedh, maam maahtah maalline nuhtjedh, gosse edtjh tjaeledh.