Forsøk
Geahččaladdan: Lávkesealla huksehus
Lávkegearddi siskkobealde gávdno cuozzageardi mii lea dušše ovtta sealla asu. Dan lea hui vuogas studeret mikroskohpas. Jus geavahat dábálaš fiskeslávkki (kepalávkki), berret lasihit ovtta goaikanasa jodaluvvosa vai oaččut eanet kontrástta govvii.
Lávkeseallat main oidnojit čielgasit seallaváibmosat ja seallaseainnit. Govva: Science Photo Library, NTB / CC BY-NC-SA 4.0
Lávkecuozza. Govva: Kristin Bøhle / CC BY-SA 4.0
- Čuohpas skalpeallain (sullii 1 x 1 cm) lávkegearddi siskkobealde. Geavat pinseahta veahkkin luvvet lávkecuocca.
- Goaikkut ovtta goaikkanasa jodaluvvosa objeaktaláse ala ja bija lávkecuocca goaikkanassii. Cuozzabihttá berre leat unnit go objeaktaláse. Sáhtát maid bidjat cuozzabihttá objeaktaláse ale ovdal go lasihat jodaluvvosa.
- Divtte luvvosa njammasit lávkecuzzii muhtin minuhtaid ovdalgo govččat gokčanlásiin.
- Bija gokčanláse várrogasat ala nu ahte it deatte.
- Geavat filttarbáhpira njammat liiggálaš golgosa.
Geahča preparáhta mikroskohpas máŋgga stuoridemiin.
Fuom! Jus okulára stuorida 10x, de stuorideapmi lea 400x go geavahat linssa mii stuorida 40x. Givrrodat lea čállon okulárii ja linsii. Geavat čuovgaráiggi ja kondensora vai oainnát nu ollu detáljjaid go vejolaš. Geahččal gávdnat dáid:- seallaseainnit oktan ráiggážiiguin
- seallaváibmosat
- cytoplasma
- vakuolat
Notáhtat, govat ja tevnnegat leat ávkkálaččat dokumentašuvdnan journalii.
- Govve seallaid okulára čađa mobiilatelefuvnnain dahje govvenapparáhtain.
- Gieđahala govaid govvagieđahallanprográmmas ja nammat osiid, dahje ráhkat sárgosa masa čálát.
- Nagodat go meroštallat lávkesealla guhkkodaga ja govdodaga? Sáhtát álggos meroštallat oaidnoviidodaga diamehtera millimehterbáhpira vehkiin.