Ovmessie baakoeh
Orre baakoeh daerpies
Ij saemien-gïelen leah baakoeh gaajhkese mïsse daan biejjien daerpies man bïjre soptsestidh. Jiene-jienebh baakoeh mejtie daaroen-gïeleste löönebe, englaanten gïeleste jïh jeatjah ammes-gïelijste, goh lööneme-baakoeh. Muvhth baakoeh verbh mejtie don aejkiej lööneme, goh löönedh, lïeredh jïh heannadidh. Mubpieh jis baakoeh substantijvh goh kraanna, gærhkoe jïh tïjje. Urrebh lööneme-baakoeh leah bïjle, busse, motovre-sygkele jïh skovtere.
Muvhth baakoeh mijjieh sveerjen gïeleste lööneme goh klaasetjelmieh, glasögon, jïh mubpieh jis nöörjen gïeleste goh prælloeh, briller. Gellien aejkien gosse man bïjre soptsestidh jallh tjaeledh, dellie tjoerebe ussjedidh, mah baakojde jallh magkerh baakoeh dellie nuhtjedh. Gellie orre baakoeh eah gænnah saemien baakoe-gærjine gååvnesh.
Orre baakoeh båeries baakojste
Daaletje seabradahkesne mijjieh jiene-jienebh baakoeh daarpesjibie orre aatide. Saemien-gïelesne gellie nuepieh orre baakoeh darjodh båeries baakojste goh seerkeme-baakoeh. Dovletjistie saemieh naemhtie dorjeme. Gellie urrebh baakoeh aaj naemhtie seerkeme, goh girtie, daaroen-gïelesne fly, verbeste girtedh. Jeatjah baakoeh jis rïekte baakoste baakose jarkoestamme goh maana-gïerte, daaroen-gïeleste barnehage. Saemien baakojste maana jïh gïerte, mij orre ektiedimmes-baakoe. Ruevtie-raajroe, daaroen-gïeleste jernbane, baakojste ruevtie jïh raajroe dorjeme, daaroen-gïelesne jern jïh raide. Daaroen baakoe raide jis saemien-gïeleste båata. Daaroen-gïelen baakoe helikopter, dïsse mijjieh orre saemien-baakoem dorjeme baakoste haepkie mij lea stoere ledtie, daaroen-gïelesne hauk jallh falk. Dam aaj ruevtie-haepkine gåhtjobe.
Dåehkie-baakoeh
Saemien-gïelesne gellien aejkien geerve sjiehteles dåehkie-baakoeh gaavnedh, daaroen-gïelesne fellesord. Saemien-gïelen ajve sjïere baakoeh dosse dïsse. Dan åvteste nöörjen gïeleste lööneme dyjre baakoste dyr, jïh sveerjen gïeleste juvre baakoste djur. Baakoem kreeke aaj lööneme daaroen-gïeleste krek, mij båata baakoste kreatur. Daaroen-gïelesne daagkeres dåehkie-baakoeh sïejhme, v.g. kjøretøy, møbler jïh natur.
Mah sjiehteles baakoeh
Muvhten aejkien öövre geerve naan sjiehteles baakoem gaavnedh. Juktie goltelæjjah jallh lohkijh edtjieh guarkadidh dellie kaanne aelhkemes lööneme-baakoem nuhtjedh. Dagke dellie daerpies, jïh aaj buerebe, baakoem löönedh.
Gellien aejkien bööremes orre baakoeh saemien maadth-baakojste seerkedh. Jis ibie sjiehteles seerkeme-baakoem gaavnh dellie byörebe aaj ussjedidh man jeatjah vuekien mietie maam jiehtedh baakoej- jïh jiehtegigujmie mij saemien-gïelesne buerebe sjeahta.
Mijjieh byörebe iktegisth ussjedidh, magkerh baakoeh veeljedh jïh nuhtjedh. Jis mijjieh jïjnjh ammes baakoeh löönebe goh lööneme-baakoeh, guktie dellie minngemes sjædta, dellie mijjen gïele vielie tjïelke saemien-gïele?