Allegorije

Allegorije lea soptsestimmieh, teeksth jallh guvvieh. Ibie edtjh dejtie toelhkestidh öövre guktie leah, men symboli mietie. Maehtebe jiehtedh allegorije lea symbole. Mijjieh maehtebe allegorijem gaavnedh romaanine jallh draamine.

Juvre-fabelh maehtieh allegorije-teekstine årrodh. Teekstesne Bïerne (gærjesne: Lohkede saemien) dellie mijjieh Lutniestæjjan bïjre lohkebe guhte eatnamisnie fealedeminie. Lutniestæjja edtja johken rastah jïh viehkiem daarpesje. Bïerne Lutniestæjjam viehkehte jïh dam johkem rastah saehtele. Dellie bïerne almetji jïjtsevoeth vuesehte. Men dah jeatjah juvrh jïh almetjh mah idtjin sïjhth Lutniestæjjam viehkiehtidh nåakebe jïjtsevoeth vuesiehtieh.

Viertiedasse lea seamma goh parabele. Viertiedasse lea åenehks teekste, mij jortigi-soptsesvuekien mietie tjaaleme. Viertiedasse lea biejjieladtje heannadimmiej bïjre. Heannadimmie lea goh guvvie gusnie mij akt jeatjebe vöörhkesovveme. Lohkije tjuara jïjtje pryövedh guarkedh man bïjre teekste.