Tradisjon, kulturuttrykk og kulturarv

Tenk over eller diskuter etter du har sett filmen:

• Kva inntrykk får du av den rolla kulturuttrykk og tradisjonar har når det gjeld identiteten til ungdommane i filmen?

• Fleire av ungdommane snakkar om at tradisjonar og det å føre kulturen vidare er viktig for dei. Korleis er dei med på å føre kulturen sin vidare?

• Er tradisjonar viktige for deg, og er du med på å føre kultur vidare på nokon måte?

Opne bilete i eit nytt vindauge

CC BY-NC

Bilete: Amit Dave

At kulturuttrykk er viktige for både individ og samfunn, kjem tydeleg fram i UNESCOs konvensjon om å verne og fremme et mangfold av kulturuttrykk som Noreg og dei fleste andre land i verda har forplikta seg til å følgje.

Konvensjonen slår fast at mangfaldet av kulturuttrykk i verda i dag er viktig for menneska samla sett, men nemner spesielt minoritetar og urfolk. Språkleg mangfald blir òg framheva som svært viktig for det kulturelle mangfaldet, sidan språk er nøkkelen for å få tilgang til kulturuttrykk og tradisjonell kunnskap.

Det å ha tilgang til tradisjonelle kulturuttrykk fremjar eiga utvikling for alle menneske. Samtidig seier konvensjonen at kulturell samhandling og kreativitet òg er viktig, slik at kulturen ikkje stivnar i tradisjon, men kan utvikle seg i takt med samfunnet og den kvardagen vi lever i.

Tradisjonar er kulturelle element som blir overførte mellom generasjonar. Med tida vil det kulturelle innhaldet forandre seg fordi kvar generasjon tolkar og attskaper det på sin måte. Store samfunnsendringar kan føre til at kulturelle element ikkje blir overførte mellom generasjonane, til dømes fordi dei ikkje deler same kvardag eller språk.

Fornorskingspolitikken mot den samiske befolkninga i Noreg trua overføringa av tradisjonar som går tusenvis av år tilbake. Mellom anna vart ein heil generasjon fråteken språket sitt, og språket er som nemnt nøkkelen til kulturell kunnskap. Det at kommande generasjonar lærer samiske språk er heilt nødvendig for å verne samisk kulturarv. Samtidig ser vi at dei samiske ungdommane i filmen i stor grad tilpassar tradisjonane slik at kulturuttrykka speglar ein moderne samisk identitet.

Noreg har òg skrive under på ein eigen konvensjon for å verne om den typen kulturuttrykk som blir kalla immateriell kulturarv.

Kulturrådet har fått det faglege ansvaret for å gjennomføre arbeidet med dette, og ein del av dette arbeidet er å samle inn kunnskap om den immaterielle kulturarven til spesielt urfolk og nasjonale minoritetar. På nettstaden til Kulturrådet kan du sjå døme på kulturuttrykk som er ein del av ein immateriell kulturarv som framleis er i bruk.