Kulturelle dimensjonar: individualisme vs. kollektivisme

Sjølvstende er den viktigaste norske verdien, ifølgje Harald Eia i denne episoden av NRK-programmet Typisk norsk. Dette er ein viktig verdi i det vi kan kalle individualistiske kulturar.

Geert Hofstede utvikla ein modell om kulturelle dimensjonar for å gi retningslinjer til kommunikasjon på tvers av kulturar. Individualisme/kollektivisme er ein av dimensjonane i modellen, og Noreg er eit av landa som skårar høgt på individualisme.

Teorien til Geert Hofstede kan kritiserast for å bruke nasjonar som kulturelle einingar, sidan dei fleste land inneheld mange ulike kulturelle fellesskapar. Dimensjonane kan likevel vere ein nyttig analysereiskap viss du har fagkunnskap om ulike tilnærmingar til kultur og dei konsekvensane dei kan ha.

Nasjonalkulturar som den norske er altså ikkje noko vi kan definere ut frå einskaplege og avgrensa skildringar, men dei kulturelle dimensjonane kan likevel beskrive nokre generelle trekk ved eit samfunn. I tabellen under har vi samla ulike faktorar som kjenneteiknar individualisme og kollektivisme.