Bygg din eigen vindturbin

For å kunne lage ein vindturbin som er mest mogleg effektiv, må de gå i djupna på vindturbinar og vindteknologi.

Det de finn ut i prosessen, skal de bruke til å byggje dykkar eigne modellar av vindturbinar.

Det lokale energiselskapet vurderer å søkje om få byggje eit vindkraftverk. Før dei går vidare med planane, vil dei finne ut korleis vindturbinane bør sjå ut, og korleis dei bør plasserast i forhold til kvarandre.

1. Lag forslag til korleis ein vindturbin bør utformast for at han skal generere mest mogleg effekt. Han må dessutan tole belastninga godt og bestå av lett material.
2. Lag ein plan for korleis vindturbinane bør setjast opp i forhold til kvarandre.
3. Lag ein modell (fysisk eller digital) av ein vindturbin og eit vindkraftverk.

Set dykk inn i korleis vindturbinar fungerer.

Kva faktorar påverkar effekten til ein vindturbin?

Det er fleire faktorar som påverkar kor effektiv ein vindturbin er. De skal undersøkje desse faktorane og velje dei løysingane som kan gi størst effekt:

• talet på rotorblad på vindturbinen
• forma på rotorblada
• vinkelen mellom rotorblada på vindturbinen og innkomande vind
• plasseringa til vindturbinane i forhold til kvarandre i vindkraftverket

Planlegg

1. Legg ein plan for korleis de skal finne ut korleis vindturbinen bør konstruerast.
2. Lag hypotesar/spørsmål som de testar ut. Døme på hypotese: Vindturbinen gir mest effekt med fire rotorblad.

Presenter det de har funne ut. Lag ein rapport, biletserie eller film.

De har laga eit sluttprodukt med høg måloppnåing viss presentasjonen inneheld

• dokumentasjon av arbeidsprosessen
• målingar og vurderingar de har gjort
• ferdige modellar

Lektor 2 Naturfagsenteret. (u.å.). Energiproduksjon. Henta 24. februar 2020 frå https://www.lektor2.no/c2235378/artikkel/vis.html?tid=2235334