Forklaringar til påstandane
Påstandar
Nokre dagar er det veldig kaldt, då kan det ikkje vere global oppvarming.
Nokre dagar er det veldig varmt, då må det vere global oppvarming.
Forklaring
Desse påstandane tek utgangspunkt i at vêr og klima er det same.
Det er viktig å skilje mellom vêr som det vi observerer frå dag til dag, og år til år, mens klima er det gjennomsnittlege vêret vi har hatt over ein periode på 30 år.
Sjølv om det var veldig kaldt i fjor, så kan vi ikkje konkludere med at global oppvarming ikkje skjer.
Påstandar
Bevisa som er samla over mange år, tyder på at det er global oppvarming.
Du kan ikkje bruke vêret til å vurdere om det er global oppvarming.
Forklaring
Ved å måle til dømes temperatur og nedbør over lange periodar, kan ein seie noko om korleis klimaet har endra seg.
Ifølgje NASA har den gjennomsnittlege temperaturen på jorda auka med 0,8 °C sidan 1880. Sjølv om dette ikkje høyrest mykje ut, må vi hugse på at dette er eit gjennomsnittstal som skjuler store variasjonar over korte periodar og på ulike stader på jorda.
Vêret kan forandre seg mykje frå dag til dag. Det er mykje som påverkar kva slags vêr vi har. Derfor er det veldig vanskeleg å føreseie korleis vêret blir berre nokre dagar fram i tid.