Industrialisering langs Akerselva
Krafta i Akerselva, eller Frysja, som ho tidlegare vart kalla, har vorte utnytta av menneske i hundreår. Vi har kjelder heilt frå mellomalderen som viser at det har vore kornmøllar langs elva. Krafta har òg vore brukt til stampar av ulike slag, og til papirmøller, oljemøllar og sagbruk.
Akerselva hadde stor betydning for den industrielle revolusjonen i Noreg på 1850-talet, og det var tekstilindustrien som starta det heile. Vi kan seie at det er to forteljingar om industrialiseringa langs Akerselva:
Den eine handlar om utviklinga, optimismen og framtidstrua som sørgde for ei betydeleg verdiskaping i det fattige Kristiania. Industrialiseringa gav nemleg arbeid til mange, og framveksten av kapital gav kjøpekraft til både bedriftseigarar og arbeidarar. Denne framstillinga av historia kan vi kalle "den blå sida" – ho fortel om krafta i kapitalismen.
Den andre sida av historia handlar om dei tøffe arbeidsvilkåra som dei tilsette i industrien opplevde. Det resulterte mellom anna i framveksten av arbeidarrørsla, og vi kan kalle dette for "den raude sida" av historia.