Øving
Bruk farga lappar i idémyldring
Å skrive ned idear, og sterke og svake sider ved dei, på lappar i ulike fargar er ein mykje brukt kreativ metode. Du kan bruke han når du jobbar individuelt, men metoden fungerer aller best i grupper. Då kan de sortere ideane på ei tavle eller eit bord, og diskutere dei undervegs.
Ei gruppe elevar jobbar med idémyldring etter lappemetoden. Video: Bartosz Paszkiewicz, Wallace James McCririck Meling / CC BY-NC-SA 4.0
Post-it-lappar. Bilete: NTB / Avgrensa bruksrett
Gå saman i grupper på 4–6 elevar, og set av 10–15 minutt til øvinga. Vel ei oppgåve, problemstilling, utfordring eller moglegheit de skal jobbe med på skulen. Finn fram noko å skrive med, og lappar i fargane gul, grøn og raud eller rosa. Post-it-lappar fungerer fint, sidan dei er enkle å feste til ei tavle eller ein vegg.
- Del ut gule lappar til alle i gruppa. Alle skriv ned idear på dei – éin idé på kvar lapp.
- Heng opp lappane og sorter dei gjerne etter innhald.
- Bruk grøne lappar til å skrive ned styrkar ved ideane. Kva for gode sider har dei?
- Heng dei grøne lappane ved sida av dei gule idé-lappane dei høyrer saman med.
- Skriv svakheitene ved kvar idé på dei raude eller rosa lappane. Finst det farar ved ideane, eller er det noko som vanskeleg lèt seg gjennomføre?
- Heng desse lappane òg ved sida av ideane dei høyrer saman med.
- Diskuter undervegs og vel til sist ut éin eller fleire idear de vil jobbe vidare med.
Eit hovud fullt av idear. Bilete: Zoonar / CC BY-NC-SA 4.0
Denne kreative metoden blir gjerne kalla lappemetoden eller kreative lappar. Sjølv om metoden fungerer best ved gruppearbeid, kan du òg bruke han når du skal utvikle idear åleine.