Bygge eit personleg læringsnettverk
Eit digitalt personleg læringsnettverk (PLN) har to delar:
- eit sett med tenester og verktøy på Internett
- ein systematisk plan for korleis tenestene og verktøya skal brukast til læring
Kva tenester og verktøy du vil inkludere i PLN-et ditt, er opp til deg. Eit læringsnettverk er heller ikkje noko du bygger ein gong for alle. Eit godt nettverk utviklar seg heile tida. Nye tenester og menneske kjem til medan gamle forsvinn.
Det er mange moglege kjelder til informasjon som du kan inkludere. Du kan for eksempel
- bli medlem av faggrupper på sosiale medium. Det finst mange grupper på Facebook, LinkedIn og andre sosiale medium for bestemde interesser og yrkesgrupper.
- følgje kunnskapsrike eller profilerte personar på X
- abonnere på fagbloggar
- abonnere på RSS-straumar frå interessante nettsider
- følgje interessante YouTube-kanalar
- bli medlem av fagforum
Men målet er ikkje å samle flest mogleg ressursar. Hugs at du òg må kunne følge opp dei ressursane du inkluderer. Til det treng du ein plan. Tenk gjennom kva type kunnskap og informasjon du har behov for, korleis du skal bruke nettverket ditt, og kva menneske du gjerne vil ha kontakt med.
Å inkludere for mange ressursar kan føre til at den kunnskapen du faktisk har behov for, druknar i ”støy”. Målet med eit digitalt personleg læringsnettverk er at du skal
- vite kven som har den kunnskapen du treng
- vite kvar du finn den informasjonen du treng
- få ny informasjon som du ikkje visste at du trong
Utgangspunktet for Internett var at det skulle bli enklare for forskarar på universitet i ulike byar og land å dele informasjon med kvarandre. Denne delingskulturen er framleis ei av de sterkaste drivkreftene for mange av dei mest brukte tenestene på nettet i dag. Tenester som Wikipedia og sosiale medium som Facebook og YouTube er baserte på at det er brukarane sjølve som produserer innhaldet og gjer det tilgjengeleg for andre.
Med venner og kjente deler vi gjerne villig vekk, og for å få til kunnskapsdeling og læring i ei verksemd er det viktig å bygge ein tilsvarande god delingskultur med kollegaer og andre kontaktar.
På same måten som vi skil mellom arbeidstid og fritid, kan det vere lurt å skilje mellom jobb og privatliv på Internett òg.
Mange vel å ha to kontoar på sosiale medium som Facebook og X: éin for familie og venner og ein annan for kollegaer og anna som har med jobben å gjere.
Start med ein gong
Du treng ikkje å vente til du er ferdig med skulen før du begynner å bygge eit digitalt personleg læringsnettverk. Det er berre å gå i gang. Opprett nødvendige kontoar, legg til ressursar som du synest er interessante, inviter andre i klassen til å vere med i nettverket ditt.
Tenk på at de når de er ferdige på skulen, går vidare til ulike arbeidsplassar. Viss de allereie har eit nettverk på plass, kan de halde fram med å utveksle informasjon og gjennom kvarandre få kontakt med fleire i bransjen.
Eit godt nettverk gir òg ei moglegheit til å ”marknadsføre” kompetansen din. Gode ressurspersonar blir lagde merke til, og det kan gi deg både lærlingplass og jobb.