Aleksandra Joners klessjokk

Haugane av klede veks og veks. Ifølgje Hilde Kjønstad, som er innkjøpsleiar i Fretex, er nordmenn flinke til å donere klede, men ikkje like flinke til å kjøpe brukt. Ho fortel vidare at det kjem inn heile 50 tonn med klede til Fretex om dagen, men at berre 10 prosent av det dei samlar inn, blir selt i butikkane deira.

Dei resterande 90 prosentane av det som blir samla inn, blir eksportert til sorteringsanlegg i Europa, der bruktmarknaden er mykje større enn i Noreg. Hilde Kjønstad har uttalt følgjande:

Vi skulle gjerne ha selt meir brukt i Noreg, men har dessverre ikkje etterspørselen til det. Vi skulle gjerne sett at folk var like gode til å kjøpe brukt som til å gi til innsamlingsaktørane. Vi jobbar for at det skal vere inspirerande for folk å handle brukt tøy i butikkane våre.

Fjong er eit selskap som leiger ut klede, og konseptet kan beskrivast som ei strøymeteneste som lèt deg abonnere på klede. Hos Fjong kan både privatpersonar, designarar, butikkar og leverandørar leige ut klede.

Ambisjonen til Fjong er å vere med på å endre måten vi konsumerer klede på. Å auke utnyttingsgrada på antrekka vil gagne både eigarane og brukarane, i tillegg til at det er mykje meir berekraftig og økonomisk. I videoen nedanfor fortel gründeren av Fjong, Sigrun Syverud, meir om konseptet:

Kva kan vere framtidige løysingar for å få ein meir berekraftig tekstilindustri? I den relaterte artikkelen nedanfor kan du sjå Jenny Skavlan besøkje eit firma i Portugal som jobbar med å gjere avfall om til tekstilar.