Oppgåver til likviditetsbudsjett
I oppgåvene nedanfor skal du setje opp forenkla likviditetsbudsjett. For å gjere det enklare er ikkje meirverdiavgift teken med.
Last ned Excel-arbeidsboka og løys oppgåvene på arka.
Oppgåve 1
Kiosken AS har ei inngåande behaldning på kr 250 000. Kontante innbetalingar frå kundar er forventa å vere kr 350 000 i dei tre månadene januar, februar og mars. Utbetalingane er forventa å vere kr 200 000 i januar og februar, før det i mars kjem inn ein del ekstra utbetalingar, slik at det til saman blir kr 350 000 i denne månaden.
Legg inn tala i arket merka oppgåve 1, og finn ut kva utgåande behaldning i mars vil vere med desse inn- og utbetalingane.
Oppgåve 2
Lampebutikken AS sel varer på nettet. Kundane får 15 dagar kreditt. Salet er som regel jamt fordelt i kvar månad. Dette betyr at halvparten av salet blir innbetalt neste månad. På same måte får butikken 15 dagar kreditt frå leverandørane sine. Andre forventa utbetalingar står lista i tabellen.
Bruk arket merka oppgåve 2. Inngåande behaldning 1. januar er kr 100 000. Kva er utgåande behaldning i mars dette året?
Dagleg leiar vil gjerne auke lønna si til kr 50 000 brutto i månaden. Er det økonomi til det, synest du?
Månad | Januar | Februar | Mars |
|---|---|---|---|
Salsinntekt | 300 000 | 350 000 | 350 000 |
Varekjøp | 150 000 | 150 000 | 200 000 |
Løn | 40 000 | 40 000 | 40 000 |
Husleige | 15 000 | 15 000 | 15 000 |
Andre utbetalingar | 20 000 | 20 000 | 20 000 |
Oppgåve 3
Gardsbutikken AS har både kontantsal og kredittsal. I tabellen under ser du korleis forventa sal fordeler seg på dei ulike månadene. Kundane får 10 dagar kreditt. Inngåande behaldning 1. mai er kr 90 000.
Månad | Mai | Juni | Juli | August |
|---|---|---|---|---|
Kontantsal | 10 000 | 35 000 | 50 000 | 35 000 |
Kredittsal | 60 000 | 150 000 | 330 000 | 300 000 |
Gardsbutikken AS har følgande forventa utbetalingar i desse månadene. Det er 30 dagar kreditt på varekjøpet.
Månad | Mai | Juni | Juli | August |
|---|---|---|---|---|
Lønn | 50 000 | 120 000 | 120 000 | 120 000 |
Varekjøp | 60 000 | 20 000 | 20 000 | 10 000 |
Andre utbetalingar | 60 000 | 30 000 | 20 000 | 10 000 |
Bruk Excel-skjemaet og legg inn tala i arket merka oppgåve 3. Kva blir forventa utgåande behaldning 31. august? Kva vil du foreslå at Gardsbutikken AS kan gjere når dei forventar stram likviditet?