Lag presentasjonen
Dette er ein læringssti om å samanlikne førstespråket ditt med norsk. Gå til artikkelen "Presenter ei samanlikning av førstespråket ditt og norsk" for å komme til første trinn i stien.
Lag ein presentasjon
No skal du gjere om stoffet du har samla inn til ein presentasjon. Vi anbefaler at du bruker eit presentasjonsverktøy, som til dømes PowerPoint. Då kan du skrive inn døme på norsk og førstespråket ditt.
Men du kan òg skrive på tavla undervegs mens du presenterer. Det kan fungere fint viss du vil forklare mens du skriv.
Tips 1: Ikkje for mykje tekst
Viss du bruker eit presentasjonsverktøy, held det at du har ei overskrift som viser kva tema du har, nokre stikkord og gode døme frå både førstespråket ditt og norsk.
Her ser du eit døme på eit lysark som har passe informasjon:
Eit døme på eit lysark som har passe informasjon i form av både tekst og døme. Døma viser korleis du kan bruke boksar og fargar for å samanlikne ulike språk. Illustrasjon.
Tips 2: Hugs døme
Hugs å lage gode døme. Det er når du samanliknar ord og setningar frå førstespråket ditt med norsk, at du viser at du har forstått teorien. Jo fleire døme, jo betre.
Sjå til dømes på forskjellen på dei to lysarka under. Det første er utan døme, mens det andre er med. Legg merke til kor mykje enklare det er å forstå forklaringane når det er døme.
Tips 3: Bruk fagomgrep
Sjå på side 2 i presentasjonen om somali igjen. Legg merke til alle fagomgrepa som er brukte: "tal", "bestemtheit", "suffiks" og så vidare.
Bruk fagomgrep i presentasjonen din. Då viser du at du kan omgrep om grammatikk.
Tips 4: Visualiser
Å "visualisere" betyr å gjere noko synleg. Prøv å visualisere forskjellar og likskapar mellom førstespråket ditt og norsk. Det kan vere fargar, tjukk skrift, piler eller anna. Fordelen er at det blir enklare for medelevane dine å forstå.
Her kan du sjå eit døme på korleis SVO-språk og V2-regelen blir visualisert med fargar og mønster:
Går du vidare i læringsstien, vil du få tre gode råd om korleis du kan halde presentasjonen.