SWOT-analyse. Er idéen liv laga?

Opne bilete i eit nytt vindauge

CC BY-SA

Bilete: Vigdis Jonsen

SWOT er eit analyseverktøy som blir brukt til å vurdere dei sterke og svake sidene ved ein idé. Forkortinga SWOT kjem av dei engelske orda strenghts, weaknesses, opportunities og threats. På norsk blir dette set om til:

• styrkar

• svakheiter

• mogelegheiter

• truslar

No skal de bruke SWOT-analyse til å vurdere ein idé de har. Bruk til dømes ressursen Kreativitetsøving: Slumpord for å få fram gode idéar, eller bruk andre idéar de vil gå vidare med.

Her er forslag til punkt som kan vere aktuelle å ta med i ein SWOT -analyse:

Kva styrkar har idéen?

Med styrkar meiner vi sider ved idéen som gir fordelar i forhold til andre idéar eller eksisterande produkt. Dette kan vere at

• idéen gir konkurransefordelar, og det er noko som skil idéen frå andre produkt eller tenester på marknaden

• de har god kompetanse på den aktuelle idéen i gruppa, og de utfyller kvarandre godt

• idéen er lett å marknadsføre og selje

• det finst eit bra kundegrunnlag

• det er god tilgang på lokale råvarer eller tenestemogelegheiter

• de har nødvendig utstyr til å gjennomføre idéen

• plassering for bedrifta er veleigna

• det er gode mogelegheiter for å få finansiering

Kva svakheiter har idéen?

Svakheiter er faktorar som gir ei ulempe i forhold til konkurrentar: Døme på svakheiter kan vere at

• det finst liknande produkt på marknaden frå før

• det er manglande kompetanse i gruppa, og det blir vanskeleg å realisere idéen

• det er utfordringar med å skaffe utstyr

• det er utfordringar med å skaffe råvarer

• det er ein liten marknad, og kundegrunnlaget er dårleg

• det er utfordringar med finansiering

• plasseringa for bedrifta ikkje eignar seg

Kva mogelegheiter har idéen?

Faktorar de kan utnytte for å få ein fordel, kan vere at idéen har

• marknadsfordelar

• potensial for vidareutvikling

• gode salsmogelegheiter

• mogelegheit for å nyte godt av støtteordningar

Kva truslar/utfordringar møter idéen?

Truslar eller utfordringar som kan skape problem for gjennomføringa av ideéen, kan vere

• konkurranse frå liknande produkt eller tenester i marknaden

• nye lover og reglar

• finansiering

• at produksjonen er vêr-og/eller sesongavhengig

Bruk gjerne tabellen under når de skal analysere idéen dykkar. Klikk på pluss-teikna for å legge til aktuelle punkt for idéen de analyserer. Til slutt kan de eksportere det de har skrive, inn i eit dokument og gjere eventuelle justeringar i layout. De har laga dykkar eigen SWOT-analyse!