Musikkvideo: produksjon og etterarbeid

Opne bilete i eit nytt vindauge

CC BY-NC

Bilete: Maskot

Før de skal spele inn, er det viktig at de har oversikt over planar og utstyr.

• Start med å sjekke utstyret, og dobbeltsjekk at de har pakka det de treng, og mange nok batteri.

• Sjekk at location og rekvisittar er klare.

• Om de ikkje har fordelt roller i produksjonen, så gjer det no. Kven skal filme? Kven har regi?

• Sjå gjennom storyboard og planar ein siste gong. Hugs at det er lov å improvisere litt under opptak, men ikkje gløym å følgje hovudplanen.

• Vurder om de treng å lage ei skotliste, som er ei oversikt over alle kameravinklar og utsnitt de har tenkt å bruke.
  
  Her kan de laste ned og skrive ut ein mal for skotlister.

• Alle i gruppa er til stades under opptak. Ver nøyaktige med iscenesetjinta og biletkomposisjonar, og hald roa!

• Pass på at de bruker ulike utsnitt, varierer perspektiv og har godt lys. I musikkvideosjangeren er det lov å eksperimentere med filmspråket!

• Ta vare på utstyret og rekvisittane, og hugs å rydde opp når de er ferdige.

Når opptaka er gjorde, skal de klippe saman materialet. Alle i gruppa skal redigere kvar sin versjon av musikkvideoen i eit eigna redigeringsprogram.

• Legg lyden på eitt lydspor og bileta på eitt eller fleire videospor.

• Vurder klipperytmen. Skal bileta klippast til rytmen i songen eller ikkje?

• Jobb med overgangar og visuelle effektar. Ein musikkvideo har gjerne mange filmatiske effektar. Leik og eksperiment!

• Bruk gjerne fargekorrigering for å reparere dårlege bilete, for å skape stilen du er ute etter, eller for å få videoen til å sjå meir profesjonell ut.

Når du har redigert ferdig, må musikkvideoen eksporterast som ei filmfil. Du kan eksportere filmen i fleire filformat, men vi foreslår at du bruker formatet H.264. Då får du god kvalitet på lyd og bilete samtidig som du får komprimert videoen din til ei MP4-fil.

Publiser musikkvideoen din på ein eigna kanal, og del han med andre. Om du vil publisere musikkvideoen din på YouTube, må du hugse å leggje til tittel og skildringar.