Eit godt produkt er gjennomtesta. Det er lett å sjå seg blind på si eiga løysing, derfor er det viktig å finne ut korleis brukarane opplever produktet eller løysinga. Involverer du brukarane tidleg i prosessen, avdekker du feil på eit tidleg stadium, og det er svært sannsynleg at du får eit betre produkt.
Brukartesting gir deg kunnskap om korleis brukaren opplever ein nettstad, ei programvare eller eit medieprodukt. Innsikta bruker du til å forbetre brukarvennlegheita.
Brukartesting gir betre brukarvennlegheit og lønnsemd
Å prioritere brukarvennlegheit er lønnsamt fordi
det blir betre kvalitet på produkt eller løysing
brukarar av digitale løysingar finn enklare fram og kan løyse brukaroppgåver kjapt
du får meir fornøgde brukarar
positivt omdømme gir fleire kundar/brukarar
Lurt å brukarteste tidleg
Brukaren kan ha behov for noko anna enn det du trur. Brukartestar du tidleg, kan du spare tid og pengar på design og utvikling. Det er dessutan betre å teste med éin brukar tidleg enn mange seint.
Brukartest tidleg
Brukaren kan oppdage feil eller ønske seg sentralt innhald du ikkje har tenkt på.
Du får ein peikepinn på om du er på rett veg, og kva som kan vere problematisk.
Jo lenger ut i prosessen, jo meir kostbart er det å gjere store endringar.
Kontinuerleg brukartesting
Brukartesting er viktig i heile levetida til eit produkt. Vi brukartestar for å kvalitetssikre produksjonsprosessar, frå skisser i idéfasen til prototype og ferdig løysing.
Når ein app eller programvare er lansert, er det behov for vedlikehald og oppgraderingar. Brukartesting er verdifullt for å teste gjeldande løysing og utvikle nye versjonar.
Kjelder
Krug, S. (2014). Don´t make me think Revisited. A Common Sense Approach to Web and Mobile Usability. New Riders Publishing.
Toftøy-Andersen, E. &Wold, J. G. (2011). Praktisk brukartesting. Cappelen Damm akademisk