Ull- og garnduojár

Som ull- og garnduodjár skal du kunne velje ut materiale og spinne garn til produksjon. Vidare vev du i ulike teknikkar, både med grindvev og vevstol.

Handstrikketeknikkar høyrer med i faget. Enkelte jobbar òg med strikkemaskiner.

Som lærling i faget utviklar du kunnskap om samiske veve- og strikkemønster. Du får erfaring med å designe og konstruere mønster og med å produsere strikka og vovne produkt.

Ein ull- og garnduodjár må ha kunnskap om ullfibrar og garn, og om tradisjonelle mønster. Du bør ha eit godt handlag, vere nøyaktig og ha evne til å bruke kreativitet i eigne arbeid. I tillegg må du kunne kommunisere godt med kundar og oppdragsgivarar.

Utdanninga for å bli ull- og garnduodjár er to år i vidaregåande skule og to års lære i bedrift. Det første året tek du vg1 handverk, design og produktutvikling. Det andre året vel du vg2 duodji. Etter to år i lære i ull- og garnduodjifaget kan du ta sveinebrev.