Olympisk genserdesign

Dale of Norway har hatt ein avtale med Norges Skiforbund om å lage dei offisielle OL- og VM-genserane heilt sidan 1956. Til kvar meisterskap får dei norske idrettsstjernene eit nytt genserdesign.

Døme frå Sotsji-OL i 2014

Alle dei norske utøvarane, idrettsleiarane, trenarane og støtteapparatet brukte OL-genseren gjennom heile Sotsji-OL i 2014. Denne OL-genseren blei strikka i Dale-fabrikken i Vaksdal utanfor Bergen. Dei har produsert garn og strikkeplagg heilt sidan 1879.

Genseren var designa i dei norske fargane og hadde flaggstriper i halspartiet. Samtidig følgde han trenden med tradisjonelt, men moderne retromønster. Designaren la inn eit kryss i mønsteret. Etter gammalt var dette eit symbol som skulle drive bort vonde ånder. I tillegg symboliserte metallvalet i glidelåsen jakta på gull.

Lillehammer-effekten

OL- og VM-genserane sel godt i Noreg, men dei er unntaket. Dale of Norway har større omsetning utanlands enn her heime. Du finn klesmerket i butikkane på mange av dei store vintersportsstadene i både USA og Europa. I Noreg er det helst turistar som kjøper genserane. Selskapet har òg laga genserar for skiforbunda i USA og Canada.

I OL-genserhistoria skil likevel OL på Lillehammer i 1994 seg ut.

– Eksporten til utlandet eksploderte med Lillehammer-OL. Då var det ville tilstandar her. Vi sleit med å produsere nok genserar og måtte hyre inn idrettslag for å få unna pakkinga, fortel Tvedt.

Strikking er trendy. Framleis er det norske og tradisjonelle populært. Dale Garn sel mønster til dei ulike OL- og VM-genserane, og i Noreg er det mange som vel å strikke genserane sjølve.

– Under VM i Oslo i 2011 var heile stadion full av VM-genserar. Det var vanvitig morosamt! Det er artig at eit så lite firma som vårt har vorte så synlege internasjonalt, seier Tvedt.

Gratis strikkeoppskrifter

Du treng ikkje betale i dyre dommar for strikkehefta. Du kan laste ned strikkeoppskrifta frå Dale heilt gratis. Her finn du også oppskrifta på genseren alt starta med, «Cortina», frå 1956.