Materiale og utstyr
Kva tekstil du vel å bruke, er valfritt, men bomull eller lin er kanskje enklast. I tillegg treng du måleband, glidelås, saks, nål, tråd, symaskin, rull med papir og eventuelt overlockmaskin (overkastingsmaskin). Vel du å trykke dekor, har du òg bruk for tekstilmåling, kontaktpapir og svamp.
Del 1. Idéutvikling og planlegging
- Lag minst tre ulike forslag til ei pc-veske der du konsentrerer deg om form, fargar og dekor.
- Finn måla til din eigen berbare pc, og lag ein mal av denne i papir. Legg på minimum 3 cm ekstra rundt kanten slik at du har nok stoff til samansyinga.
- Vel ei av skissene du laga i punkt 1, og lag ein plan for dei ulike delane og dei ulike tekstila du treng.
- Bestem deg for kva slags dekor og teknikk du vil bruke, til dømes tekstiltrykk, lappeteknikk eller applikasjon. Eksperimenter og lag prøvelappar.
Eit tips før du startar:
Tenkt over bruken av dei ulike materiala – ikkje klipp midt i eit stoff, men arbeid deg ut frå eit hjørne.
Del 2. Gjennomføring
- Lag mønster og klipp ut alle delane du treng til pc-veska. Bruk malen du laga i del 1, til å klippe ut to delar til fôr i filtmaterialet. Har du laga fleire delar til dekorering, må du hugse å legge til 1 cm saumrom.
Legg den eine fôrdelen saman med framsida, og sy dei saman med sikksakksaum eller med overlockmaskin. Gjer det same med den andre fôrdelen og baksida.
Sy i glidelåsen. Glidelåsen skal vere festa på rettsida med taggane i motsett retning av opninga på pc-veska. I dømet på biletet er det brukt ein glidelås som ikkje heng saman i endane. Dersom du har ein glidelås som skal henge saman i ein av endane, kan det vere greitt å sy i glidelåsen til slutt.
- Legg framsida og baksida saman, rette mot rette, og sy dei saman med rettsaum.
- Vreng arbeidet, og du har ei ferdig pc-veske.
Del 3. Eigenvurdering
Vurder det ferdige resultatet og din eigen arbeidsprosess:
- Vernar veska pc-en din, og passar ho til maskina di?
- Korleis er det estetiske uttrykket? Korleis synest du dekoren fungerer saman med forma på veska?
- Korleis er kvaliteten i handverket ditt? Er det nokon teknikkar du bør øve meir på?
Innlevering
- skisser og prøvelappar
- ferdig produkt
- eigenvurdering