Verktøy
Smihammar
Du må ha ein kraftig hammar for å forplante slaget gjennom materialet. Ein smihammar er ein 400–750 gram tung hammar med ein flat ende på hammarhovudet. Metallet blir drive ut til alle retningar på grunn av den flate forma. På den andre sida av hammarhovudet er forma avrunda. Større materialtjukn krev ein tyngre hammar.
Ambolt
Ambolten er underlaget vi smir på. Den er eit benkeverktøy som finst i mange storleikar og variantar, alt etter kva han skal brukast til. På arbeidsbenken har vi gjerne små amboltar i herda stål.
Ein typisk ambolt er ein jernkloss med ein stor og solid kjerne, flat bane på midten og horn på sidene. Det eine hornet er avrunda, slik at du kan bruke det til å smi bogar og ringar. Det andre hornet er firkanta med rette kantar og eignar seg til å smi kantar og hjørne. Nokre amboltar har hol til å feste verktøy i.
Det er viktig at ambolten er polert opp slik at metallet flyt best mogleg utover når det blir smidd. Pass på at det ikkje kjem rusk eller støv imellom når du jobbar med metallet. Det kan lage striper som blir slått inn i metallet.