G-kode for rekkert: førebuingar

Når du skal programmere ein CNC-fres, er det ofte enklast å bruke ei digital teikning og programvare for å generere ei G-kodefil frå teikninga. Men slik programvare kan vere svært kostbar, og ho må vere tilpassa CNC-maskina di. Ein annan metode er å skrive G-koden sjølv, basert på ei teikning.

Teikninga er alltid grunnlaget for G-koden. Vi må finne hjørne, linjer, bogar og senterpunkt, og vi må sette opp koordinatane for desse punkta.

Start- og stoppunkt

Teikninga over viser grunnmåla for ein rekkert og kan godt brukast som grunnlag for ein G-kode. Vi må alltid finne eit passande start- og stopp-punkt og ta utgangspunkt i dette. I denne oppgåva har vi teke utgangspunkt i senterlinja til rekkerten og snudd rekkerten på hovudet, slik at vi startar midt på den rette linja på toppen av rekkerten.

Avrunda hjørne

På rekkerten vi skal frese, ønsker vi dessutan å avrunde alle hjørna, noko som gir oss litt større utfordringar. Måla i den første teikninga stemmer då ikkje lenger, og vi må hente inn nye mål.

Til dette bruker vi teikneverktøyet (CAD-programmet). Målsettings-verktøyet finn kvar rette strekar startar og sluttar, og dessutan kvar bogne linjer startar og sluttar. I tillegg klarer teikneprogrammet å gi opp senterpunktet for alle bogna linjene.

Punkta for start og stopp av bevegelsar treng du for å kunne lage eit
G-kodeprogram. Viss du vil programmere med kommandoane I og J i staden for å bruke bogeradiusane, må du også målsette senterpunkta for bogeradiusane.

Når du har opna fila i teikneverktøyet, må du målsette alle punkta du treng, og angi dei i eit koordinatsystem med X og Y. Då treng du følgande:

• startpunkt for freseoperasjonen, med koordinatane X og Y

• retning du ønsker å frese i (på teikninga vår: moturs)

• start- og stoppunkt for den enkelte linja eller bogen, med koordinatane X og Y

• ved bruk av kommandoane I og J: senterpunkta for radiusar i bogne linjer. Alternativt radiusane for dei enkelte bogane.

• avstanden mellom startpunktet for ein boge og senterpunktet for bogen i X- og Y-retning

På teikninga under er desse punkta markerte. Oransje markering angir start- og stoppunkt for bevegelsar, mens blå markering angir senterpunkt (origo) for sirkulære bevegelsar.

Når du har målsett alle desse punkta ut frå den tekniske teikninga di, kan du gå vidare til programmering.