Øving
Tema: arkitektur.
Gå på jakt og fotografer utsnitt med rytme, ro og rørsle på skulen din, ute og inne. Du skal bruke fotografia som inspirasjon vidare i denne øvinga.
Lag eit lite hus i papir. Ta utgangspunkt i eit A3-ark. Hugs kantar til å lime.
Lag mønster og dekor på huset med svart eller farga tusj. Huset skal dekorerast med komposisjonar som viser rytme, ro og rørsle.
Klipp ut, brett og lim.
Set husa til alle i klassen saman til ein liten by, og lag ei utstilling.
Diskuter
Finn de nokre likskapstrekk i dekorane som uttrykkjer ro? Eller i dekorane som skaper rørsle?
På kva for nokre ulike måtar har de skapt rytme i komposisjonane?
Kvifor kan vi seie at det er rørsle i ein dekor, sjølv om mønsteret du har teikna, står heilt stille?
Rytme
Rytmar er gjentakingar av element. Rytme har med inndeling å gjere,
anten jamt og symmetrisk eller uregelmessig og asymmetrisk.
Ro
Retninga på linjene i ein komposisjon er med på å skape uttrykket. Horisontale og vertikale linjer skaper ro. Vertikale linjer gir eit inntrykk av høgd, kraft og verdigheit. Geometriske former er konstruerte, rette og stabile. Slike former er meir statiske og vil skape meir ro. Pyramiden er ei geometrisk form som har eit lågt tyngdepunkt, og uttrykkjer harmoni, ro og stabilitet.
Rørsle
Rørsle i ein komposisjon handlar om fart, retning, aktivitet og kraft. Rørsle i eit design skaper eit spennande og dynamisk uttrykk og er det motsette av ro og harmoni. Diagonale linjer, bølgjer eller s-linjer skaper rørsle, spenning, djupn og dynamikk.