Overflatebehandling av tre
Oljing er ein av dei eldste metodane for overflatebehandling som vi kjenner. Olje framhevar strukturen i treet, og vi beheld den gode kjensla av å ta på tre.
Bruker du vassløyseleg beis eller lakk, bør du vassbeise først. Det vil seie at du fuktar overflata med varmt vatn, slik at fibrane som har vorte pressa ned under pussinga, reiser seg igjen. Når treet er tørt, pussar du dei bort med eit fint pussepapir, til dømes korning 180. Slik unngår du at fibrane reiser seg etter at du har beisa eller lakkert overflata.
Beis tilfører farge, utan å vere dekkjande. Slik kan du framheve den vakre strukturen i treet. Hugs at fargen kan variere avhengig av den naturlege fargen på treverket, og at beisen blir mørkare for kvart lag du påfører. Beis med ein pensel eller svamp i lengderetninga til treet. Etterpå fjernar du overflødig beis, til dømes med ein klut.
Vi bruker lakk til å verne treet eller for at vassløyseleg beis ikkje skal kunne vaskast bort. Lakken gir ei blank eller matt overflate. Lakk kan vere tynna med ulike væsker som avgjer kor sterkt han luktar, og kva slags verneutstyr du bør bruke. Påfør lakken jamt med pensel i lengderetninga til treet.
Måling er dekkjande, og trestrukturen blir skjult. Bruk jamne rørsler og ver lett på handa når du målar, slik at du får ei jamn og fin overflate.
Relatert innhald
Måling er fellesnavn på alt stoff som er flytande og brukast til overflatebehandling av materiale. Lær meir om målinga sine bestanddelar og eigenskapar.
Selfjord A. & Thoresen S. (2009). Design og trearbeid. Yrkeslitteratur AS. Oslo.