Utstyr
- målereiskap: ein pensel i valfri storleik
- limstift
- saks
- måling – bland ein valfri blånyanse og tynn målinga ut med vatn slik at ho blir lett å jobbe med
- 20 A3-ark eller eitt stort som du deler inn i 20 område
Utforsking: ulike måtar å lage teksturar med penselen på
De får to minutt til å prøve ut kor mange ulike uttrykk og teksturar de kan lage med penselen. Prøv å dekkje eit heilt A3-ark eller eit område med mange ulike forsøk. Her må de tenkje på kva trykk de legg på penselen, kva grep de har, retninga og vinkelen på penselen, og rørsla de gjer.
Mønster og gjentakingar
De skal tolke fleire beskrivande ord ved hjelp av nokre enkle reiskapar og reglar.
Del 1: Striper og linjer
Bruk seks A3-ark eller 6 område på eit stort ark.
De skal jobbe i 2 minutt på kvart ark/område og lage ulike mønster ved hjelp av striper og linjer. Eksperimenter med storleiksforhold, rytme og tettleik på stripene. Ved berre å måle striper og linjer skal de visualisere desse beskrivande orda:
- organisk
- geometrisk
- kontroll
- kaos
- systematisk
- usystematisk
Kvart ord skal bli til sitt eige mønster som dekkjer eit ark/område.
Del 2: Prikkar
Bruk seks nye A3-ark eller seks nye område på det store arket. De skal jobbe i to minutt på kvart ark/område og lage ulike mønster berre ved hjelp av prikkar.
Eksperimenter med storleiksforhold, rytme og tettleik på prikkane. Visualiser dei same beskrivande orda: organisk, geometrisk, kontroll, kaos, systematisk og usystematisk.
Del 3: Overflater og tekstur
Igjen skal de jobbe i to minutt på seks område, men denne gongen skal de måle ei dekkjande overflate / ein tekstur i kvart område. Visualiser dei same beskrivande orda som tidlegare: organisk, geometrisk, kontroll, kaos, systematisk og usystematisk.
Del 4: Vel ei skisse
Vel ei av skissene dine og gi henne til sidemannen til høgre.
Del 5: Klipp skissa i bitar
Bruk saksa og klipp skissa du har fått, i fleire små bitar. Gi alle dei klipte delane vidare til sidemannen til høgre.
Del 6: Lag komposisjonar
Lim saman dei mottekne delane på ein ny måte. Du kan lime dei på ei av skissene dine eller på ein kvit bakgrunn. De skal bruke dei same beskrivande orda frå del 1 og jobbe etter.
Refleksjon
Tenk over og diskuter i klassen:
- Korleis var det å jobbe på tid?
- Korleis var det å berre bruke ein målereiskap?
- Var det vanskeleg å gi frå seg skissa si?
- Korleis var det å klippe i arbeidet til nokon andre?
- Kva har de lært?