Ellos eatnu – La elva leve

Ester flyttar til Alta for å jobbe som lærarvikar. Ho held den samiske bakgrunnen sin skjult for både kollegaer, elevar og resten av verda.

Ein dag blir ho med fetteren sin til ein protestleir der både samar og miljøaktivistar demonstrerer mot eit vasskraftverk i Altaelva som regjeringa planlegg å bygge.

Dette blir starten på ei reise der Ester gjenoppdagar dei samiske røtene sine og blir fylt av kampånd.

Filmen er ein fiksjonsfilm som tek utgangspunkt i faktiske historiske hendingar.

På denne måten får du ikkje berre lære meir om dei historiske hendingane, men du får òg eit nært innblikk i skjebnen til dei menneska som vart utsette for diskriminering.

Ellos eatnu – La elva leve gir innsikt i korleis det var å vere samisk i Noreg få tiår etter at fornorskingspolitikken avtok på 50-talet.

Filmen fortel òg historia om den største sivile ulydnadsaksjonen til samane, noko som seinast i 2023 var eit høgaktuelt tema då det vart demonstrert mot utbygging av vindmøller på Fosen.

Hovudrolleinnehavar Ella Marie Hætta Isaksen er sjølv aktivist og stod i bresjen under Fosen-demonstrasjonane i 2023.