Money Back, Please

Vi ser ei lita jente inne på eit kjøpesenter. Ho går omkring, tilsynelatande utan mål og meining. Plutseleg ser vi henne med ei lue på hovudet, alarmen går og ein vektar spring etter ho. Har ho stole lua?

Vektaren prøver å snakke med jenta både på norsk og engelsk, men det er vanskeleg å kommunisere. Jenta blir redd når fleire vaksne kjem til for å prøve å ta lua frå henne. Ho hyler, slår og spring under eit bord. Mora til jenta, som er ein av tiggarane i byen, dukkar òg opp.

Det viser seg at lua ikkje er stolen. Det er ein butikkmedarbeidar som sjølv har kjøpt ho til jenta, sidan det er så kaldt ute. Kva skjer når mora til jenta vil byte tilbake lua og få pengar tilbake frå butikken?

Even Hafnor (fødd 1985) er utdanna regissør frå SAE-instituttet i Byron Bay i Australia. Han har skrive og regissert kortfilmane Small talk (2015), Til evig tid (2013), Money Back, Please (2013) og Det norske språket som var opningsfilm på Kortfilmfestivalen i 2012.

Hafnor vann i 2015 Gullstolen for beste norske kortfilm med filmen Small Talk i konkurranseprogrammet på Kortfilmfestivalen i Grimstad, der han har skrive manus og deler regi med Lisa Brooke Hansen.

Money Back, Please har vunne ei rekke prisar, mellom anna juryprisen i Bergen internasjonale Filmfestival (2013).