Lord of the flies

Lord of the flies er ein spelefilm frå 1963, regissert av Peter Brook. Dette er den første filmatiseringa av romanen til William Golding med same namn.

Filmen vart spelt inn i Puerto Rico, og gutane i filmen er amatørskodespelarar.

Etter ein flykrasj er ei gruppe unge britiske skulegutar åleine på ei tropisk øy. Ingen vaksne overlevde flystyrten, og gutane må klare seg åleine.

For å overleve lager gutane sine eigne reglar og sosiale strukturar. Eit nytt samfunn tek form med ekspedisjonar, hyttebygging og jakt.

Etter kvart veks maktkampen og rivaliseringa mellom gutane. Konfliktane tilspissar seg, og vald, grufulle handlingar og tilbeding av ein ny Gud blir snart ein del av livet på øya.

Filmen opnar for refleksjon rundt om det finst ein ibuande vondskap i oss menneske.

Er den primitive brutaliteten vi ser hos gutane, noko som faktisk kan oppstå dersom kjende samfunnsstrukturar forsvinn, og kvar og ein må kjempe for si eiga overleving?