Planlegge ein enkel marknadsføringskampanje
Steg | Fokus | Beskriving |
|---|---|---|
1 | Mål for kampanjen | Kva er målet med kampanjen?
|
2 | Kven er målgruppa vår? | Her må vi tenkje gjennom kven som er i målgruppa vår, til dømes demografiske opplysningar som kjønn og alder, bustad eller spesielle interesser. |
3 | Kva er bodskapen vår? | Kva ønske og behov har målgruppa? Korleis skal vi fange merksemda til målgruppa, og korleis skal vi få målgruppa til å gjere som vi vil? |
4 | Kva kanalar skal vi velje? | Kvar finn vi målgruppa vår? Bruker dei sosiale medium, og i så fall kva for nokon? Skal vi annonsere på TV, på radio eller i nettaviser? Utforminga av bodskapen må òg tilpassast kanalane vi vel. |
5 | Kva skal kampanjen koste? | Kva kostar det å annonsere i dei ulike kanalane, og kvar får vi mest att for pengane? Kva har vi sett av til denne kampanjen i marknadsplanen vår? |
6 | Oppfølging av kampanjen i kampanjeperioden | Det er smart å teste ulike bodskapar og kombinasjonar av tekst og bilete. Kva bodskapar fungerer bra, og kva fungerer mindre bra? Kan vi gjere endringar undervegs som gir oss eit betre resultat? |
7 | Analyse av kampanjen | Når kampanjen er avslutta, må vi sjå målet med kampanjen opp mot resultatet. Nådde vi måla våre? Er det erfaringar vi kan ta med oss vidare til neste kampanje? |
I artikkelen "Kva er ein marknadsføringskampanje?" finn du fleire detaljar om kvart av punkta ein kampanje bør innehalde.
Tenk deg at du og nokre venner ønsker å arrangere juleball for alle elevane på skulen. De startar planlegginga tidleg på hausten. Etter kvart kjem alt det praktiske som lokale, mat, musikk og kanskje underhaldning på plass.
Målet er at flest mogleg elevar skal delta. Korleis skal de få med alle?
De lagar ein marknadsføringskampanje for juleballet.
- Tidleg på hausten vil de henge opp plakatar på skulen for å gjere juleballet kjent blant elevane.
- De opprettar ei Facebook-gruppe, eller ein event, og inviterer alle elevane. Her kan alle melde seg på.
- De ønsker å dele ut ein personleg invitasjon til alle elevane.
- I Facebook-gruppa postar de jamleg nyheiter om kva som skal skje på juleballet, og kor mange som har meldt seg på.
De lagar med andre ord ein marknadsføringskampanje med ulike aktivitetar for at flest mogleg skal kjenne til, og melde seg på, juleballet. Målet er at flest mogleg av elevane skal delta.
Ein kampanjeplan kan då sjå slik ut:
Innhald | Beskriving |
|---|---|
Mål for kampanjen | Skulen har 375 elevar, og målet er at alle skal delta. |
Målgruppe | Alle elevar |
Bodskap | Bli med på juleball, dette vil du ikkje gå glipp av. God stemning, god musikk, god mat og overraskingar! |
Kanalar | Plakat, Facebook-gruppe og personleg invitasjon |
Kostnad | Dersom vi sel billettar til 80 % av elevane (300 billettar), kan vi bruke 3000 kr på marknadsføringskampanjen. |
Oppfølging av aktivitetane | Vi lagar ein eigen innhaldsplan for posting av innlegg i Facebook-gruppa og ser kva som skaper mest engasjement. |
Analyse av kampanjen | 90 % av elevane deltok. Dette gjekk veldig bra :) |
Innhaldsplanen for kva de skal poste på Facebook, kan sjå slik ut:
Dato | Innhald | Ansvar |
|---|---|---|
15. oktober | Invitere til juleball | Katrine |
15. oktober | Status påmelde | Katrine |
17. oktober | Status påmelde | Katrine |
18. oktober | Kort filmsnutt frå komiteen | Trine |
20. oktober | Status påmelde | Katrine |
21. oktober | Status påmelde | Katrine |
23. oktober | Marknadsføre DJ og musikk | Anders |
25. oktober | Invitere – ny invitasjon | Katrine |
1. november | Intervju med nokon som er påmeld | Trine |
10. november | Vise bilete av maten | Anders |
15. november | Intervju med nokre påmelde – kva kjole skal dei ha på? | Trine |
osv. |
No har de ein plan for kva marknadsføringskampanjen dykkar skal innehalde. Arrangementskomiteen må no følge opp kampanjen med jamlege møte mens han er i gang.