Kanalar, måling og val av kanalar

Med kanal i denne samanhengen meiner vi ein marknadsføringskanal. Det er eit samband mellom bedrifta som sendar og personen som får ein bodskap. Kanalar er altså ulike medium vi kan bruke til å kommunisere med kundane våre eller potensielle kundar i målgruppene våre.

Det finst mange ulike kanalar

• tv, nett-tv og YouTube
• radio og podkast
• sosiale medium som Facebook, Instagram, LinkedIn og Snapchat
• nettsider og bloggar
• influensarar
• nyheitsbrev på e-post
• postkassereklame
• telefon
• papiraviser og nettaviser
• messer og konferansar
• reklameplakatar i offentlege rom

Kva slags kanalar skal vi velje?

Det er mange kanalar å velje mellom, og det kjem stadig nye til. Kva slags kanalar vi skal velje, er avhengig av fleire forhold:

• I kva slags kanalar finn vi målgruppene våre?
• I kva slags kanalar når vi flest i målgruppene til ein lågast mogleg pris? Kvar får vi mest igjen for pengane?
• I kva slags kanalar kan vi forvente å få best respons på aktivitetane våre?

Her finst det ingen fasit. Medievanane våre forandrar seg heile tida. Det som var ein god kanal for å nå yngre brukarar i går, er kanskje den beste kanalen for ei meir vaksen aldersgruppe i morgon. La oss sjå på eit døme med tal frå Ipsos SoMe-tracker:

• I fjerde kvartal av 2016 var det blant personar i Noreg over 60 år berre 23 prosent som hadde ein profil på Snapchat.

• I 2017 hadde prosentdelen i same aldersgruppe auka til 33 prosent.

• I 2019 hadde prosentdelen auka til 41 prosent.

Tala viser ein auke på 64 prosent i løpet av tre år i denne aldersgruppa. Det fortel oss noko om kor raskt medievanar kan forandre seg.

Gjennom marknadsundersøkingar og statistikk frå dei ulike kanalane kan vi følge med på korleis folk sine medievanar og brukaråtferda deira endrar seg. Dette kan hjelpe oss med å velje rett kanal for å nå målgruppene våre.

Statistisk sentralbyrå (SSB) gjennomfører årleg ei undersøking av folks medievanar. Ho blir kalla Norsk mediebarometer. Her finn vi mykje informasjon om folk sine medievanar. Vi kan mellom anna sjå tal for bruk av medium etter kjønn, alder og utdanning. Som biletet under viser, var det ifølge undersøkinga berre 21 prosent av befolkninga i Noreg som las papiraviser kvar dag i 2022, mot 84 prosent i 1991.

Eit anna verktøy som kan hjelpe oss til å velje rett kanal, er Ipsos SoMe-tracker. Her finn vi statistikk over folk sin bruk av sosiale medium. Statistikken blir oppdatert kvart kvartal (kvar tredje månad). Oversikta som er avbilda nedanfor, viser kor stor del av den norske befolkninga som bruker dei ulike sosiale media dagleg. I fjerde kvartal av 2023 var Facebook det mest brukte sosiale mediet i Noreg.

Vi kan òg hente ut detaljert informasjon om kor mange personar som har ein profil i kvart enkelt medium, og kor mange som bruker mediet dagleg, fordelt på kjønn og aldersgrupper. Biletet under viser slik informasjon for Facebook:

Når vi veit meir om folk sine medievanar, er det er òg enklare å velje rett kanal.