Livsstilen din

Opne bilete i eit nytt vindauge

CC BY-NC

Bilete: DGM

Det er godt dokumentert at livsstilen vår, som omfattar mellom anna fysisk aktivitet og kosthald, har mykje å seie for helsa vår. Ein av dei verkeleg store helseutfordringane i dagens samfunn er inaktivitet i kvardagen. Endringar i reisevanar og arbeidsrutinar, tilgang til informasjon på internett og lettvinte løysingar på mange område gjer at vi beveger oss mindre og mindre. Talet på personar med fedmeproblem aukar faretruande i befolkninga. Derfor er det viktig å bli bevisst.

Begrensa bruk

Bilete: Helseundersøkelsen i Trøndelag, NTNU

Målet med oppgåva er at du gjennom auka bevisstgjering om din eigen livsstil skal kunne skape gode vanar i kvardagen – og på den måten få best mogleg livskvalitet.

I denne oppgåva skal du

1. bli bevisst på og loggføre aktivitetsnivå, skjermtid, søvnrytme og kosthald i 4–7 døgn ved hjelp av oppgåver og eit eige registreringsskjema lenger ned (Livsstilen din – oppgåver og loggføring).
2. innhente relevant bakgrunnsteori og lage ei grafisk framstilling av eigne resultat ved å bruke statistikk
3. skrive rapport der du sjølv vurderer eigne resultat og samanliknar dei med nasjonale tilrådingar og data frå Ung-HUNT. Bruk reknearket Ung-HUNT-data.

Rapporten skal innehalde

• relevant bakgrunnsteori som omhandlar nasjonale tilrådingar for søvnbehov, skjermtid, kosthald og fysisk aktivitet
• beskriving av metode for innhenting av eigne data
• grafisk framstilling av eigne resultat
• drøfting av og refleksjon over eigne resultat samanlikna med nasjonale tilrådingar og Ung-HUNT-data
• kjeldetilvisingar

Livsstilen vår blir påverka av dei vala vi tek i kvardagen, men også av sosiale faktorar. Dette omfattar forholdet elevane har til seg sjølve, til andre og til det sosiale miljøet i klassen, i heimen og på fritida. Dette er det viktig å vere klar over når du skal rettleie elevar i denne oppgåva.

Oppgåva er berekna å ta cirka 15 undervisningstimar, som gjerne kan fordelast over tre veker. Ho er godt eigna som ei tverrfagleg oppgåve i faga kroppsøving, naturfag og matematikk.

Vedlagt ligg spørjeskjemaet til Ung-HUNT. Det kan brukast til å gjennomføre undersøkinga i klassen. Resultata frå klasseundersøkinga kan brukast på fleire måtar:

• Du kan rettleie elevane i korleis dei kan framstille eigne resultat ved bruk av statistikk.
• Du kan tilpasse oppgåva og gjere ho meir generell: Elevane kan, i staden for å samanlikne eigne data, samanlikne dataa frå klassen med nasjonale tilrådingar og Ung-HUNT-data.
• Du kan tilpasse oppgåva og gjere ho endå meir omfattande: Elevane kan, i tillegg til å samanlikne eigne resultat, også samanlikne dataa frå klassen med nasjonale tilrådingar og Ung-HUNT-data.

NTNU. (u.å.). Om HUNT. Henta 3. juni 2020 frå Om HUNT