Prosjektoppgåve – døme
Eit av kompetansemåla i matematikk 2P og matematikk 2P-Y er at eleven skal kunne "analysere og presentere funn i datasett frå lokalsamfunn og media". I tillegg skal eleven "bruke og vurdere val av formålstenlege sentralmål og spreiingsmål for statistisk datamateriale" og "forklare og bruke prosent, prosentpoeng og vekstfaktor til modellering av praktiske situasjonar med digitale verktøy".
Ta utgangspunkt i SSBs side om kommunefakta. Vel heimkommunen din. Sida viser den siste gjeldande statistikken på fleire ulike område, til dømes befolkning og kva innbyggarane jobbar med.
Vel deg eitt av temaa som blir presenterte på sida. Oppgåva er å seie noko om korleis eitt av eller nokre av tala har endra seg dei siste åra. Det kan til dømes vere korleis befolkninga i aldersgruppa 10–20 år i kommunen din har variert dei 10 siste åra.
For å finne data bakover i tid må du klikke på kjeldelenka for temaet du har valt. Skroll deretter ned til "Se alle tall fra denne statistikken", og vel den lenka som gir deg dataa du treng. Lenka fører deg til Statistikkbanken, der du kan velje data og laste ned som rekneark eller CSV-fil. Du kan sjå eit døme på bruk av Statistikkbanken på sida Behandling av store datamengder i Python.
Bruk Python, rekneark eller GeoGebra til å behandle dataa. Avhengig av kva du ønsker å finne ut, kan det vere aktuelt å finne sentralmål og spreiingsmål og/eller å sjå på prosentvis vekst.
Sluttproduktet i dette arbeidet skal vere todelt.
Hovuddelen skal vere ein munnleg presentasjon. Det er valfritt om du vil gjennomføre han i klasserommet eller spele han inn som ein film. Presentasjonen skal vere inntil 10 minutt lang og skal innehalde
ei innleiing der du presenterer problemstillinga og kva du ønsker å finne ut
ein hovuddel der du presenterer og analyserer funn
ei avslutning der du samanfattar og lagar ein konklusjon knytt til problemstillinga
kjelder
I tillegg skal du levere eit refleksjonsnotat. Det skal innehalde
ein logg over arbeidet
ei oversikt over korleis kjeldene er brukt
refleksjonar om prosessen og kva du har lært
refleksjonar om kva du eventuelt kunne ha gjort betre
| Låg måloppnåing (2) | Middels måloppnåing (3–4) | Høg måloppnåing (5–6) | |
|---|---|---|---|
| Problemstilling | Problemstillinga er uklar eller veldig vid. | Problemstillinga er delvis klar, men kan spissast meir. | Problemstillinga er klar og formulert slik at det er mogleg å svare på ho. |
| Handtering av data | Data er lasta inn i Python eller eit anna formålstenleg verktøy, men det er ein del feil og manglar. | Data er lasta inn i Python eller eit anna formålstenleg verktøy på ein grei måte. | Data er lasta inn i Python eller eit anna formålstenleg verktøy på ein god måte, og dei ulike tala er behandla på ein effektiv måte. |
| Analysering av data | Det er gjort nokre utrekningar til støtte for ein konklusjon, men desse er mangelfulle. | Det går fram korleis du gir eit svar på problemstillinga ut frå talmaterialet. | Du har brukt nyttige representasjonar av talmaterialet som dannar grunnlag for ein konklusjon på problemstillinga. |
| Kommunikasjon | Det er vanskeleg å følge resonnementa som dannar grunnlaget for konklusjonen. | Dei ulike tala og grafiske representasjonane er ok, men litt mangelfulle. | Det er god samanheng mellom dei ulike elementa i presentasjonen (tabellar, grafar, resonnement), og det er lett å følge resonnementa. |
| Kjeldebruk | Du har oppgitt nokre kjelder. | Du har oppgitt kjeldene dine, og det er mogleg å sjå korleis du har brukt dei. | Du har oppgitt kjeldene dine og brukt dei på ein god og formålstenleg måte, og samanhengen mellom kjeldene og presentasjonen er tydeleg. |