Tillaging av kongekrabbe

Kongekrabba høyrer opphavleg ikkje heime i norske farvatn og har ein øydeleggjande verknad på økosystemet. Denne krabba kan vi derfor ete mykje av med godt samvit. Ho har mykje kjøt og smaker søtt og aromatisk.

Kongekrabba blir vanlegvis omsett frosen, anten kokt eller råfrosen. Det er stort sett beina og det indre beinfestet (støen) som blir nytta. Det er lite mat inne i sjølve skjolda, og denne blir vanlegvis ikkje nytta. Råfrosen krabbe bør tinast langsamt på kjøl over natta.

Kongekrabbe kan du koke og servere naturell, eller du kan steikje, grille, gratinere eller fritere ho. Du kan nytte ho i salatar, i supper, i gryter eller til å lage farse av. Skalrestane er fine å nytte til kraft.

1. Kok opp ein stor kjele med vatn. Bruk ca. 40 gram salt per liter vatn.

2. Legg i den rå krabba når vatnet koker, og lat krabba koke forsiktig i ca. 18 minutt.

3. Ta ut krabba, og lat ho avkjøle seg.

4. Del krabba i mindre bitar før servering: Del beina mellom ledda og på langs. Ta bort brusken.

5. Server med godt brød, smør, sitron og majones.