Pannesteiking
Det er viktig at du startar med varm panne, og då bør du nytte nøytral olje i byrjinga, for han toler høgare temperatur enn anna feitt. Når råvara har byrja å få ein fin gyllen og brun farge (maillardreaksjon), kan du skru ned varmen, slik at det ikkje brenner seg. No kan du halde fram steikinga og tilsetje til dømes smør, sitron, urter eller andre smakar du ønskjer å tilføre.
Framgangsmåte
- Varm panna, ha i litt nøytral olje og legg i fisken.
- Krydre fisken med salt og pepar, og la fisken steikje ordentleg på den eine sida først, slik at han får ei gyllen og fin steikeskorpe.
- Mot slutten skrur du ned varmen. Ta i eit par klattar med smør og litt sitronsaft, og snu fisken.
- Krydre fisken på den andre sida òg, og la fisken steikje eit par minutt til han har byrja å bli stram og flake seg. Bruk ei matskei og aus litt av steikesjyen over fisken mens han steikjer.
Det som er viktig når du pannesteiker fisk, er at fisken får ei god bruning på den rette sida av fiskefileten. Der sit nemleg feittet, og dette feittet blir "sprengt" inn i fileten viss det blir godt steikt. Då får fisken masse god smak og ein saftig konsistens.
Ikkje alle fiskeslag eignar seg til skinnsteiking, men torsk, skrei, makrell, uer og havåbor taklar skinnsteiking bra. For å få eit godt resultat er det viktig at skinnet blir skrapa for skjel først. Bruk same framgangsmåte som for pannesteiking.
I denne videoen viser kokk Kjartan Skjelde korleis du pannesteiker fisk.