Utveksling og transport av gassar
I lungene tek blodet opp oksygen og kvittar seg med karbondioksid. Dette skjer ved diffusjon.
Det er fleire faktorar som medverkar til effektiv gassutveksling mellom alveolane og blodet:
Både alveolane og kapillara består av berre eitt lag med svært tynne epitelceller (0,0003 mm).
Både alveolane og kapillara har eit stort samla overflateareal.
Pusting gjer at alveolane blir ventilerte konstant. Samtidig strøymer blod med låg oksygenkonsentrasjon og høg karbondioksidkonsentrasjon kontinuerleg til lungekapillara.
Hastigheita på blodstraumen er på sitt lågaste gjennom kapillara.
Kapillara er så små at dei raude blodcellene, som transporterer det meste av oksygenet, blir pressa gjennom med breisida mot kapillarveggen.
Tenk gjennom kva betydning kvar av desse faktorane har.
Transporten mellom alveolane og cellene blir teken hand om av sirkulasjonssystemet. Oksygenet blir transportert i raude blodceller, der det er bunde til hemoglobin. Ei viktig tilpassing er at evna hemoglobinet har til å binde oksygen, blir påverka av det fysiske og kjemiske miljøet i blodet, til dømes temperatur, pH og karbondioksidkonsentrasjon. Dette forklarer korleis hemoglobinet kan ha lett for å binde oksygen i lungekapillara (éin type miljø), samtidig som det har lett for å gi frå seg oksygen i vevskapillara (ein annan type miljø).
Det er berre ein mindre del av karbondioksidet (cirka 30 prosent) som blir transportert bunde til hemoglobin. Mesteparten blir transportert i blodvæska som hydrogenkarbonat. Hydrogenkarbonat blir danna når karbondioksid reagerer med vatn.
Cellene
Celleandinga forbruker oksygen og produserer karbondioksid. Cellene har derfor lågare oksygenkonsentrasjon og høgare karbondioksidkonsentrasjon enn blodet. Dette gjer at oksygen diffunderer frå blodet til cellene, mens karbondioksid diffunderer motsett veg. I kvile har ikkje cellene behov for så mykje oksygen, så då er det berre 25 % av oksygenet i blodet som diffunderer over til cellene. Ved hardt muskelarbeid eller når vi held pusten, vil blodet kunne gi frå seg opp mot 75 % av oksygenet.