Om Evolution
I dette spelet skal du bygge din eigen skapning ved å kople saman ledd, knoklar og musklar. Klarer du å skape ein ny skapning som kan gå, springe og hoppe?
Gjennom dette spelet kan du lære
korleis musklar og skjelett fungerer saman for å skape rørsle
korleis evolusjonsprosessar kan gå føre seg
Det du lærer i spelet, kan du bruke når du jobbar med livsprosessen rørsle i biologi.
Spelet er vanskeleg å bruke for personar med synshemming og fungerer ikkje med tastaturnavigering eller skjermlarer. Andre artiklar der du kan lære om korleis musklar og skjelett fungerer saman:
Slik speler du Evolution
Bygg opp din eigen organisme ved hjelp av tre "byggesteinar": ledd, knoklar og musklar.
Start med å velje ledd (joint)
Ledda bruker du til å kople saman knoklane (bone).
Musklane må festast mellom to knoklar.
Når du trykker på Evolve, blir skapningen din sleppt laus, og evolusjonen startar ved hjelp av ein genetisk algoritme.
Spel Evolution
Du kan spele Evolution i nettlesaren eller laste det ned på PC eller Mac.
Utfordring: Prøv å lage desse skapningane
Prøv dykk fram og prøv å lage ein skapning som beveger seg mest mogleg likt
eit menneske
ein edderkopp
ein frosk
kjæledyret ditt
Viss du treng inspirasjon og idéar, kan du ta ein kikk på eit galleri med skapningar andre har laga med Evolution.
Tips!
Kroppen til skapningen din vil ikkje forandre seg i løpet av "evolusjonen". Skapningen du bygger, må derfor vere i stand til å utføre den handlinga han er tiltenkt, reint fysisk. Pass til dømes på at du legg til nok musklar.
Når du trykker på hjernen, startar evolusjonen. Denne delen er heilt utanfor kontrollen din. Her kan du berre lene deg tilbake og sjå skapningen din utvikle seg.
Etter å ha spelt
Kor langt klarer skapningen din å springe? Samanlikn med dei andre i klassen. Kanskje de vil arrangere ein konkurranse mellom alle dei nye skapningane i klassen?
Kva kjenneteiknar dei skapningane som klarer å springe lengst? Samanlikn med dyr som er kjende for å vere gode løparar. Kva finn de ut?
Samanlikn musklane i spelet med musklar i verkelegheita. Kommenter likskapar og forskjellar.
Kva oppgåve har musklane
i verkelegheita?
i denne simuleringa?
Kva er oppgåva til hjernen i denne simuleringa?
Kvifor heiter spelet "Evolution"? Forklar.
Å kunne bevege seg blir rekna som ein livsprosess, ein prosess som kjenneteiknar alle levande organismar. Finn døme som stadfestar dette. Klarer du å finne døme der dette ikkje stemmer?
Diskuter: Korleis kan ei slik simulering brukast til å utvikle robotar som liknar på menneske?
Slik fungerer den genetiske algoritmen
Skapningen får tildelt ein tilfeldig hjerne.
Skapningen får prøve ut den tildelte oppgåva (springing, hopping eller klatring) i eit bestemt tidsrom.
Evaluer kor godt skapningen løyser oppgåva, altså kor god fitness han har.
Lag ein ny generasjon av skapningen. Dette blir gjort ved å ta kromosom frå to skapningar og kombinere desse. Skapningar med høg fitness har større sjanse til å bli valde ut som foreldre.
Nokre gonger oppstår mutasjonar.
Den gamle generasjonen blir drepen, og den nye får prøve ut den tildelte oppgåva (punkt 2).