Songar frå nyheitene: Meteren
1. Kor mykje er 1 meter?
Elevane skal jobbe saman i par. De skal, utan hjelpemiddel, stille dykk med 1 meters avstand til kvarandre.
Læraren måler avstanden frå skotupp til skotupp. Kva for eit par har best kontroll på å anslå avstand?
2. Sjå videoen og lytt til låten
"Songar frå nyheitene" lagar låtar baserte på samfunnsaktuelle tema og sitat frå nyheiter og debattar.
Lytt til og tolk innhaldet i låten NRKs video til låten "Meteren".
3. Jobb vidare med innhaldet i teksten
Jobb i grupper med desse spørsmåla og oppgåvene:
Diskuter kva teksten handlar om.
Korleis kan denne låten knytast til temaet smittsame sjukdommar?
Den satiriske låten vart laga etter ein pressekonferanse 28. juni 2020. Kva handla pressekonferansen om?
Diskuter samanhengen mellom smittespreiing og 1 meters avstand. Korleis kan 1 meters avstand førebygge smitte?
"Me har tatt kontroll over smittespredningen i Norge …" Søk på internett, og sjå om innhaldet i songen stemmer med situasjonen i tida etter pressekonferansen.
Kjenner de til andre tiltak som vart sette i verk for å hindre smittespreiing i denne perioden? Lag ei liste over tiltaka de kjenner til. Gi ei kort forklaring av korleis kvart tiltak bidreg til førebygging av smitte.
Kan de finne nokon skjulte bodskapar i låten?
4. Lag ein eigen låt
Når det blir sett melodi til ein tekst, blir gjerne teksten lettare å hugse. Dette kan vere eit smart triks for å hugse fagkunnskap.
Del klassen inn i grupper.
Kvar gruppe vel seg eit tema under emnet forsvar mot sjukdom som de vil lage ein song til.
De skal skrive ein eigen songtekst, men vel sjølve om de vil bruke ein kjend melodi eller setje eigen melodi til teksten. Det er òg mogleg å lage ein eigna musikkvideo for å tydeleggjere innhaldet i låten.
Presenter alle songane for kvarandre. Etterpå kan det vere lurt å samle alle songane og dele dei i klassen. Dei er nemleg fine å bruke som repetisjon.