Oppgåver om formeiring og vandring hos raudåte

I løpet av éin sesong kan ein vaksen torsk legge så mykje som 0,5–15 millionar egg, raudåta legg opp mot 2000 egg, og spekkhoggaren føder berre éin til to levande ungar.

1. Kvifor så ulike strategiar?
2. Kor mange av dei avkomma som torsken, raudåta og spekkhoggaren får gjennom liva sine, må vakse opp og leve til dei har formeira seg, for at bestandane skal vere stabile?

I eggleggingsforsøket som vart gjennomført 6. mai 2013, vart éi og éi ho-raudåte plasserte i kvart sitt kammer. Dei egga som vart lagde, fall gjennom eit finmaska nett og vart på den måten skilde frå raudåta. Etter 24 timar vart egga talte opp. Raudåta legg vanlegvis opptil 50 egg per døgn, men dette varierer.

1. Kva kan eit slikt resultat brukast til?
2. Kva feilkjelder er eliminerte her?
3. Finst det andre feilkjelder?

Raudåta i Norskehavet overvintrar i kalde arktiske vassmassar på rundt 2000 meters djupne. Om våren vandrar dei nesten heilt vaksne individa (hovudsakeleg stadium 5 og 6) mot overflata for å gyte. Desse er i overkant av 2 mm lange og kan vandre cirka 1 mm per sekund.

1. Kor lang tid bruker dei på å nå overflata?
2. Kva fart svarer dette til for eit menneske som er 180 cm?

På veg mot overflata passerer hoene eit sjikt med hannar, der dei får hekta på seg ei pakke med sædceller som kan takast i bruk ved gyting.

1. Ser du nokre fordelar ved denne åtferda samanlikna med at begge kjønn gyter i dei frie vassmassane slik som for eksempel manetar og torsk gjer?
2. Raudåteegga søkk ned til djupare vasslag etter gytinga, men knapt nokon av de vaksne vandrar ned att etter gytinga. Kan du tenke deg nokre sannsynlege forklaringar på dette?