Lag medieopplevingar i nærområdet

Du skal no produsere minst fem innslag med personar som kan sjåast og opplevast av andre på ein stad i nærmiljøet ditt. Du skal bruke eit kort format og lage eit slags postkort som anten har maks eitt minutt med video og lyd, eller ein tekst på maks 400 ord. Du må òg ha eit stillbilete av kvar person du har med.

Lag eit kart eller ei skisse over kvar postkorta skal vere plassert, og lag ein plakat til kvart postkort som publikum kan bruke for å finne og oppleve postkortet.

Bestem deg for eit tema. Personane på postkorta kan vere heilt tilfeldige folk frå nærområdet ditt, eller dei kan vere knytt til eit bestemt miljø eller interessefelt. Dersom du vel tilfeldige personar, bør du lage eit tema som knyter desse saman (til dømes at dei alle bur i heimkommunen din eller nabolaget ditt).

Finn ein eigna stad for å setje opp postkorta. Lag ei skisse eller eit kart der du plasserer dei inn. Kvar skal utstillinga vere, kven er publikum, og korleis skal publikum få opp postkorta?

Vel teknologi for å vise fram dei menneskelege postkorta. Du kan la publikum finne dei ved å skanne QR-kode på plakatane med sin eigen mobil, eller du kan setje opp ein pc eller eit nettbrett på kvar post, som publikum kan trykkje på for å sjå eller lytte.

Før du lagar postkorta, er det lurt at du tenkjer over formatet. Korleis skal postkorta sjå ut? Er det nokon spørsmål du vil at alle skal svare på? Skal bileta ha ståande, liggjande eller kvadratiske format?

Lag spørsmål til intervjua og finn personar som kan delta i produksjonen din. Det er viktig at personar som medverkar i postkorta samtykkjer til å delta, og at dei og du veit kvar postkorta skal plasserast, og om andre skal sjå desse.

Når du er i gang med produksjonen, bør du helst bruke det same utstyret slik at bilet- og lydkvaliteten blir lik på alle postkorta. Hald deg til formatet du har valt. Klipp ned materialet til eitt minutt eller skriv ein tekst på 400 ord per person.

Lag eit heilskapleg design med fargeval og typografi som går igjen i postkort og plakatar i installasjonen. Slik sørgjer du for at plakatar og postkort passar saman, og det blir ei heilskapleg oppleving for publikum. Installasjonen din skal opplevast annleis enn den til ein medelev.

Kvart postkort skal ha ein plakat, i tillegg skal du lage ein startplakat eller eit informasjonsskriv der du presenterer installasjonen kort, slik at det blir tydeleg for publikum kva dette er, og korleis dei kan finne postkorta. Plakatane skal ha eit stillbilete av personen i postkortet.
Monter plakatane til installasjonen på staden, og test om det fungerer. Gjer eventuelle endringar.

Skriv eller presenter munnleg ein refleksjon og eigenvurdering av arbeidet og utviklinga di i denne oppgåva etter at du har ferdigstilt installasjonen.