Oppgave
Kva kan ein kommunikasjonsrådgjevar?
Ein kommunikasjonsrådgivar jobbar ofte med medierelaterte oppgåver. Mange har erfaring frå nyheitsbransjen før dei startar i kommunikasjonsbransjen. Særleg er det mange journalistar som jobbar som kommunikasjonsrådgivarar.
Tidligare klima- og miljøminister Tine Sundtoft (H) får gode råd av kommunikasjonsrådgivar Erik Aasheim på pressekonferansen ho heldt i samband med ein av FN sine klimakonferanser i Paris. Aasheim jobba tidlegare som journalist i NRK og Dagens Næringsliv. Til venstre på biletet seniorrådgivar Erlend Grøner Krogstad og forhandlingsleiar Aslak Brun. Bilete: Berit Roald / CC BY-NC-SA 4.0
Dersom du ønskjer å jobbe innan kommunikasjonsbransjen, har du mange moglegheiter. Du kan jobbe innan offentleg sektor, for eksempel i kommunikasjonsavdelinga i kommunen din, i eit statleg departement, eller i ei kommunal eller statleg bedrift. Du kan også få jobb i private selskap med eigne kommunikasjonsavdelingar, eller i eit byrå som spesialiserer seg på PR-rådgiving og kommunikasjon.
Oppgåve
- Gjer eit nettsøk på desse orda: «ledig stilling kommunikasjonsrådgivar».
- Gå gjennom tre til fire av søkjeresultata du får opp. Noter deg nokre av kompetansekrava, arbeidsoppgåvene og dei personlege kvalifikasjonane utlysingstekstane listar opp.
- Kva for nokre av desse er medierelaterte?
- På kva måtar er dei det?
- I kommunikasjonsbransjen er det vanleg å tilsetje personar som har jobba som journalistar. Korleis kan ein journalistbakgrunn vere nyttig i ei slik stilling?