Folketrygda blir mellom anna finansiert av trygdeavgift og arbeidsgivaravgift. Trygdeavgifta er ein del av skatten vi betaler på lønsinntekt. Arbeidsgivaravgifta er ei avgift som bedrifter må betale inn til staten for sine tilsette. Bedriftene betaler ein viss prosentsats av løna til dei tilsette.
Arbeidsgivaravgift
Hovudregelen er at bedriftene betaler 14,1 prosent arbeidsgivaravgift, men nokre kommunar har redusert sats eller fritak for arbeidsgivaravgift. Dette er eit distriktspolitisk verkemiddel som skal stimulere til etablering av bedrifter i distrikta.
Finn ut
Kor høg arbeidsgivaravgift må bedrifter i kommunen din betale?
Sjukepengar
Når ein tilsett blir sjuk, må bedrifta betale sjukepengane dei første dagane. Dette blir kalla for arbeidsgivarperioden, og den er vanlegvis på 16 kalenderdagar. Dersom den tilsette framleis er sjuk etter dette, er det folketrygda som dekkjer sjukepengane. Då blir dei utbetalte av Nav.
Nav
Nav hjelper bedrifter med å følgje opp sjukemelde, leggje til rette for tilsette med helseutfordringar og utvikle ein meir inkluderande arbeidsplass (IA). Nav kan òg hjelpe bedrifter med å rekruttere nye tilsette.
Grunnbeløpet i folketrygda
Dei fleste ytingar i folketrygda blir rekna ut med utgangspunkt i det som blir kalla grunnbeløpet i folketrygda (G). Dermed er det berre eitt beløp som blir endra i trygdeoppgjeret kvart år.
Relatert innhald
Nettside hos nav.no
Nettside hos lovdata.no