Vurder kjeldene

I skulearbeidet er du avhengig av å bruke pålitelege kjelder som har greie på det dei uttaler seg om. Det gjeld både kjelder du søkjer opp på internett eller på biblioteket, og personar du bruker som munnlege kjelder.

Når du jobbar med kjelder, må du vurdere kva kvalitet dei har. Er kjelda truverdig? Er kjelda nøytral? Har kjelda kunnskap om det du treng svar på?

TONE står for fire viktige nøkkelord som du kan bruke når du skal vurdere ei informasjonskjelde:

• Truverdig: Er kjelda sikker?
  Objektiv: Er kjelda nøytral?
  Nøyaktig: Finn du slurv og juks?
  Eigna: Kan du finne dei svara du treng?

Internett flyt over av informasjon. Søkjemotorar som Google er laga for å hjelpe oss med å finne den informasjonen vi er på jakt etter. Dei fleste av oss er ikkje flinke nok til å bruke søkjemotorane effektivt. Ofte får vi for mange treff, og treffa er ikkje like relevante. Derfor er det viktig å forstå kva ein søkjemotor er, og korleis han fungerer. I nokre tilfelle finst det likevel ein enklare veg til målet. I nettleksikon og på offentlege nettsider kan du raskt finne informasjon av høg kvalitet.

Falske nyhende, propaganda og desinformasjon har alltid vore, og er framleis, eit viktig våpen i krigar og konfliktar. Som brukar av sosiale medium kan du faktisk vere den som bidreg til at falske nyhende blir spreidde via «liker» eller deling. Men som bevisst kjeldekritikar kan du òg sørgje for å avsløre kjelder og stoppe spreiinga av falsk informasjon.