Bruk språklege verkemiddel!

Du kan velje eit meir nøytralt og formelt korrekt standardspråk, eller du kan bruke ein meir munnleg stil, kanskje med innslag av dialekt. Kva som passar best, kjem blant anna an på temaet du tek opp og på lesargruppa du vender deg til.

Tenk gjennom val av pronomen: Skal du bruke du-form og vende deg personleg til lesaren, skal du bruke vi-form, eller skal du uttrykkje deg sakleg og generelt og velje det upersonlege ein?

Plussord og minusord er blant dei viktigaste språklege verkemidla i saktekstar. Bruk dei, men ikkje overforbruk dei, for i verste fall risikerer du at lesaren blir lei teksten din og mister tilliten til deg.

Humor er til vanleg ein utmerkt døropnar, uavhengig av om folk er samde med deg eller ikkje. Ironi og sarkasme slår nok best an hos dei som er samde med deg frå før.

Er du flink til å finne treffande samanlikningar og til å leike med ord, bør du absolutt utnytte denne ferdigheita når du skriv lesarinnlegg! Ved å trekkje inn noko lesarane kjenner til frå før, syt du ikkje berre for attkjennande nikk, du kan også få lesarane til å sjå saka frå ei ny side.

Retoriske spørsmål kallar vi spørsmål der svaret i grunnen er opplagt. Slike spørsmål fungerer likevel godt i eit innlegg fordi understrekar at skrivar og lesar er samde, og fordi dei vekkjer engasjement.

Du kan godt vere litt meir raus enn vanleg med bruken av kolon, utropsteikn og spørsmålsteikn. Teiknsetjinga skal spegle at du er engasjert. Men ikkje overdriv – om det går inflasjon i skiljeteikn som «roper» til lesaren, vert han eller ho utmatta snarare enn oppildna. Sist, men ikke minst: Skiljeteikna må brukast korrekt: Punktum etter utsegn, spørsmålsteikn etter spørsmål og utropsteikn der du "hever røysta".