3D-modellering av rekkert
I videoen nedanfor får du presentert ein mogleg framgangsmåte for å 3D-modellere rekkerten. Ein 3D-modell er nøyaktig dimensjonert og kan brukast til å lage kode til å styre digitale produksjonsmaskiner som 3D-skrivarar og CNC-fresar.
Vi startar med å teikne ut kjernen til rekkerten. Her kan vi spare mykje tid om vi først teiknar halve delen og så speglar han. Det kan vere ein fordel å runde av hjørna på rekkerten. Hjørnet der handtaket går over i slagflata, er eit svakt punkt. Derfor må det leggast inn ein større radius der.
Etter at vi har lagt på radiusar på halve delen, bruker vi spegle-funksjonen i 3D-programmet til å få fram den andre halvdelen av rekkerten.
Første versjon av 3D-modellen.
Versjon med avrunda kantar.
Radiusar lagde på halve delen.
Spegla og ekstrudert modell.
Også når vi modellerer grepet, kan vi spare tid på å teikne halve delen og deretter spegle han. 2D-teikninga nedanfor viser halve delen. Dimensjonar og radiusar er lagde på.
Tjukn
For å gi handtaket tjukn bruker vi extrude-funksjonen. Tjukna kan til dømes vere 15 mm. Så speglar vi resultatet slik at vi får grunnforma til heile handtaket.
Kurvatur
Vi vil gi handtaket ei avrunda overflate. Då må vi først teikne kurvaturen vi ønsker. Den som skal bruke rekkerten, kan ha ulike behov og preferansar som vi bør ta omsyn til når vi tilpassar tjukna på handtaket. Illustrasjonen nedanfor viser kurvaturen til den eine halvdelen av handtaket.
Vinkel på handtaket
Nedre del av handtaket bør vere tjukkare slik at rekkerten ligg godt i handa. Vi må derfor også gi vinkel på handtaket. 3,5 gradar framover kan vere eit godt utgangspunkt:
I modelleringsprogrammet bruker vi extrude-funksjonen til å skjere vekk overflødig materiale.
Grep for tommel
Storleiken på tommelen varierer frå hand til hand. I tillegg verkar spelestilen inn på korleis den som bruker rekkerten, plasserer tommelen sin. Derfor bør vi sikre eit godt tommelgrep. Vi kan bruke extrude-funksjonen i programmet til å fase av kanten på handtaket og lage ei overflate å kvile tommelen på.
For å lage extrude-funksjonen treng du ei skisse på rett plan i 3D-modellen. Her legg du inn avstand frå plan og vinkel på den trekanten du bruker for å ekstrudere med etterpå.
For å teikne mutterhola opprettar vi eit plan tre millimeter frå botnen av grepet. Så teiknar vi to sekskantar på planet.
Flateavstanden til ein M4-mutter er 7 mm, men 3D-skrivaren skriv ofte ut hol litt mindre enn oppgitt i modellen fordi plasten er flytande når han blir skriven ut. Avhengig av maskina vi bruker, må vi kanskje forandre målet slik at mutteren passar godt.
Passform og avrunding
Til slutt rundar vi av handtaket så det ligg betre i handa.
Også når vi modellerer gummiflata, teiknar vi halve delen og speglar han slik at vi sparer tid.