Korleis skaffe kapital? Eit døme

Morten og Minoo er komne eit stykke på veg med planane om å starte si vesle IT-bedrift Morten og Minoos support. Vi skal sjå kor mykje kapital dei treng for å kome i gang, og korleis dei har tenkt å skaffe pengane.

Morten og Minoo har greidd å skaffe seg heile eigenkapitalen på 100 000 kr. Eigenkapital er pengar du sjølv puttar inn i bedrifta. Noko av dette har dei ordna ved å låne av foreldra sine. Begge mødrene kjem òg til å vere ein del av bedriftsstyret.

Morten og Minoo avtaler eit møte med den lokale banken for å diskutere vidare finansiering. Dei vil be om eit langsiktig lån på 50 000 kr. Eit langsiktig lån er eit lån med avdragstid på meir enn eitt år. Det er eit ønske at lånet skal gå over tre år.

Det dei treng utover dette, blir finansiert gjennom ein kassekreditt. Kassekreditt er eit fleksibelt lån med ei øvre grense på kor mykje vi totalt kan låne. Det blir avtalt ei ramme, det vil seie kor mykje ein totalt kan låne. Så betaler ein renter av det ein har brukt (eller lånt) av kassekreditten.

Mange har ei slik ordning knytt til lønnskontoen. Til vanleg står det pengar på kontoen, men ein kan til dømes trekkje 10 000 kr ekstra. På den måten kan kontoen kome i minus, og då må ein betale renter av dette.

Morten og Minoo bestemmer seg for å søkje om ein kassekreditt med ei ramme på 100 000 kr. Då vil dei ha den kontantreserven dei treng.

Møtet i banken går svært bra. Bankrådgivaren er imponert over forretningsplanen, styresamansetjinga og oppsettet over eigedelane. Banken godkjenner lånet og kassekreditten.