Arbeidsoppdrag
Del klassen inn i mindre grupper. Kvar gruppe får i oppgåve å lage ein reportasje om internasjonal mediepolitikk.
Målet med reportasjen er å gi mottakarane auka kunnskap om internasjonal mediepolitikk og gjere det lettare for dei å forstå nyheitsbiletet i dag.
Reportasjen skal handle om eigarforhold, mediesystem og mediepolitikk i to land som ligg i kvar sin verdsdel. Reportasjen skal ikkje handle om Noreg.
Reportasjen skal vere forma som ein avisreportasje som kan bli publisert i ei riksdekkjande papiravis eller nettavis.
Reportasjen skal innehalde bakgrunnsstoff, arkivbilete, eit intervju med ein person som har god kjennskap til internasjonal mediepolitikk, og eit intervju med ein person med bakgrunn i eit av dei omtalte landa.
Arkivbilete og lisensiering
De kan bruke arkivbilete som tidlegare er publiserte i nettaviser. Hugs å oppgi namnet til fotografen og rett lisens. Bakgrunnsstoff og intervju skal de lage sjølve, bygd på grundig research.
Set saman reportasjen
Reportasjen skal de setje saman ved hjelp av eit digitalt verktøy for utforming av trykte publikasjonar eller eit verktøy for design av nettsider.
Designet skal bestå av ein fengjande tittel, ein ingress som stimulerer til vidare lesing, brødtekst og informative mellomoverskrifter. Bileta skal fungere som blikkfang, men samtidig vere informative. Alle bilete skal ha bilettekst. Bilete skal også ha ein alt-tekst (alternativ tekst) med tanke på universell utforming.
Etterarbeid og eigenvurdering
De skal presentere arbeidet munnleg for læraren og klassen saman med ein refleksjon rundt produktet og prosessen. De skal også reflektere over kva de lærte av å utføre dette arbeidsoppdraget.
Kvar elev kan bruke verktøyet for eigenvurdering nedanfor som ei førebuing til presentasjonen.