Rusførebyggjande arbeid
Spesifikke tiltak for å redusere etterspurnaden har gjerne vore informasjonskampanjar og forskjellige kampanjar retta mot å endre haldningar blant dei som bruker rusmiddel.
Eit døme på dette er kampanjar mot alkohol på TV og i blad. Føremålet med slike tiltak er å endre haldninga til å bruke rusmiddel. Styresmaktene ønskjer gjennom desse kampanjane å påverke oss så vi tek dei riktige vala.
Døme på andre tiltak som reduserer etterspurnaden av rusmiddel
- aldersgrenser på kjøp av alkohol
- høgare avgifter
- kontrolltiltak mot ulovleg narkotikaomsetning
- å gjere det dyrare og vanskelegare å kjøpe alkohol
Den andre typen tiltak som ofte blir brukt, er å regulere tilgangen til rusmiddel. Målet med å redusere tilgangen og auke prisane, er at færre skal velje å kjøpe rusmiddel. Hyppige kontrolltiltak mot narkotikaomsetning er dessutan med på å synleggjere dei alvorlege konsekvensane ved kjøp, sal og bruk av narkotiske stoff.
Ofte rettar førebyggjande tiltak seg mot spesielt utsette grupper i samfunnet. Dette kan ofte vere nettopp barn og unge som er lettare å påverke, og som kan vere i faresona for å utvikle eller forsterke ein rusmiddelmisbruk. Skular og sosialstyresmakter er viktige i det førebyggjande arbeidet retta mot barn og unge.
Som barne- og ungdomsarbeidar er du derfor svært viktig i det førebyggjande arbeidet for å skape gode haldningar. Du blir ein rettleiar mot dei riktige innstillingane og dei rette vala.
I lenkjesamlinga finn du lenkjer til ein del av dei førebyggjande programma som blir brukte i barnehage og skule.
Utfordringar til deg
Er det mogleg å førebyggje rusproblem allereie i barnehagen? Grunngi svaret ditt.
Søk på rusførebyggjande tiltak på sidene til Helsedirektoratet. Diskuter det du finn på denne sida.
- På kva måtar er det drive rusførebygging i Noreg?
- Gi eksempel på tiltak som verkar rusførebyggjande.
- Kva meiner du er god rusførebygging?