Utdanning
For å bli interiørkonsulent går du første året av vidaregåande på frisør, blomster, interiør og eksponeringsdesign, andre året på interiør- og utstillingsdesign og til slutt Vg3 interiør. Du kan òg velje å gå på fagskule eller ta påbygg på Vg3 og så ein treårig bachelor innanfor fagområdet.
Jobben og personlege eigenskapar
Som interiørkonsulent treng du gode kunnskapar om form og farge. Du må vere flink med kundar og kunne setje opp budsjett og rekneskap. Set deg inn i stilhistorie, samtidig som du følgjer med på motar og trendar. Det er viktig å vite kva slags interiør som finst til kvar tid.
Når du får oppdrag frå kundar, må du lytte til ønska dei kjem med. Bruk dette saman med kunnskapen din som interiørkonsulent. Bruk planteikningar til å bestemme kvar ulike møblar kan stå. Vurder kva møblar som vil passe inn saman med anna interiør og ulike typar belysning. Vel fargar og former som kan skape eit heilskapleg inntrykk. Pass på å ha ein god dialog med kundane når du kjem med løysingsforslag.
Aktuelle arbeidsstader
Ein interiørkonsulent har gjerne eigen praksis eller jobbar for interiørarkitekt-/arkitektkontor, møbel- og utstyrsforretningar, kjøkken- og badeinnreiingsforretningar eller byggjevareforretningar. Du kan òg jobbe med bustadstyling i samarbeid med ein fotograf eller eigedomsmeklar.