Fagartikkel

Eksponeringsdesignar

Som eksponeringsdesignar planlegg og produserer du for å vise fram varer og tenester. Du kan utarbeide konsept til butikkar, messer og scene- og kulturarrangement.

Eksponeringsdesignarar jobbar ofte med butikkeksponering og å skape kreative uttrykk i butikkvindauge og kjøpesenter. Video: Hilde Gullhaug Hennes / CC BY-SA 4.0

Arbeidsoppgåver

Fotografi av messestand med ulike tekstiltrykk og ein benk med fargeprøver. — Messestand – MIJO STUDIO, London Design Fair 2019. Bilete: Miranda Tengs Brun / CC BY-NC 4.0

Eksponeringsdesignarar planlegg og gjennomfører sals-, informasjons- og opplevingsutstillingar. Dei lagar konsept og messestandar, og kan jobbe med fotostyling og styling av rom og scene.

Å utvikle idéar inneber å teikne skisser og presentasjonsteikningar og å byggje modellar. Du må velje funksjonelle løysingar, sørgje for nødvendige materiale og utstyr og stå for montering. Bruk av digitale verktøy er ein viktig del av arbeidsprosessane.

Eigenskapar

Fotografi av mann som står i ei gardintrapp og hengjer opp eit tekstiltrykk. — Rigging av messestanden, MIJO STUDIO. Bilete: Miranda Tengs Brun / CC BY-NC 4.0

Som eksponeringsdesignar jobbar du både kreativt og handverksmessig. Du bør kunne tenkje nytt, ha evne til å visualisere og ha sans for form og farge. Det er ein stor fordel å ha anlegg for praktisk arbeid. I arbeidet treng du både teknisk forståing og kunnskap om materiale. Du må også kunne kommunisere godt med oppdragsgivarar, leverandørar og andre kollegaer. Ver bevisst på samanhengen mellom uttrykket du skaper, og korleis ulike målgrupper kan oppfatte og assosiere til dette.

Utdanning

For å bli eksponeringsdesignar vel du eit 3-årig yrkesfagleg utdanningsprogram. Du startar med vg1 frisør, blomar, interiør og eksponeringsdesign. Deretter tek du vg2 interiør og eksponeringsdesign og vg3 eksponeringsdesign. Fullført og bestått opplæring fører fram til yrkeskompetanse. Yrkestittelen er eksponeringsdesignar.

Relatert innhald

Fagstoff

Fagområde i eksponeringsdesign

Eksponeringsdesign blir delte inn i sals-, informasjons- og opplevingsutstillingar, fotostyling og styling av rom og scene.